ގިނަ ދުވަސްތަކަކަށްފަހު ޖުމްހޫރީ ޕާޓީގެ ލީޑަރު ގާސިމް އިބްރާހިމް އިއްޔެ ނޫސްވެރިންނާއި ބައްދަލުކުރެއްވިއިރު، ނޫސްވެރިންގެ ސުވާލުތަކުގެ ސަބަބުން ގާސިމް ކޯފާ އިސްކުރައްވައިފި އެވެ.
ރާއްޖޭގައި އިންޑިއާ ސިފައިން ތިބޭ ތިބުމާއިމެދު ސުވާލު ކުރުމުން ގާސިމް ވަނީ އެކަމަށް ސީދާ ޖަވާބެއް ދެއްވަން ދެކޮޅު ހައްދަވައިފަ އެވެ. އެގޮތުން ގާސިމް ވިދާޅުވީ ރާއްޖޭގައި އިންޑިއާ ސިފައިން ތިބިކަން އެނގިވަޑައިނުގަންނަވާ ކަމަށެވެ. އަދި މި ސަރުކާރުން އެފަދަ ކަމެއް ކުރައްވައިފާނެކަމަށް ގަބޫލުވެސް ނުކުރައްވާކަމަށް ގާސިމް ވިދާޅުވި އެވެ.
ރައީސް އިބްރާހިމް މުހައްމަދު ސޯލިހު ވަކި ގޮތަކަށް އަމަލު ކުރައްވަންޖެހޭފަދަ މަޖުބޫރީ ހާލަތެއް ނެތްކަމަށް ގާސިމް ވިދާޅުވި އެވެ. އެގޮތުން ސިފައިންގެ ލިސްޓެއް ސަރުކާރުން ގެންގުޅޭކަން އެނގިވަޑައިނުގަންނަވާ ކަމަށާއި މިވެރިކަމުގައި ރާއްޖޭގައި އިންޑިއާ ސިފައިން ނުތިބޭނެކަން އެކި ބޭބޭފުޅުންގެ ބަސްތަކުން ކަށަވަރުކޮށްދީފައިވާކަމަށް ގާސިމް ވިދާޅުވި އެވެ.
"އަޅުގަނޑަކަށް ނޭނގެ އޭގެ ހަގީގަތެއް. އެއްވެސް ގައުމެއްގެ މިލިޓަރީ ބަޔަކު ތަމްރީނެއް ދޭން ފިޔަވައި އެއްމަސް ނުވަތަ ދެމަސް ދުވަހަށްވުރެއް ގިނަ ދުވަހު މިތާ ތިބުމަކީ އަޅުގަނޑުމެން ދެކޮޅު ކަމެއް"
- ގާސިމް އިބްރާހިމް
އޭގެފަހުން އަނެއްކާވެސް ނޫސްވެރިން އިންޑިއާ ސިފައިންނާއި ބެހޭ އިތުރު މައުލޫމާތު އަރުވައި ސުވާލު ތަކުރާރު ކުރި އެވެ. އެއާއެކު ގާސިމް ވިދާޅުވީ އައްޑޫއަށްވެސް ހަނިމާދޫއަށްވެސް ވަޑައިނުގަންނަވާތީ އިންޑިއާ ސިފައިން ލޮލުން ދެކެވަޑައިނުގަންނަވާ ކަމަށެވެ. އެހެންކަމުން ބަޔަކު އެއްޗެކޭ ކިޔާތީ މަގުމައްޗަށް ނިކުމެ ތެޅިގަންނަންވީތޯ ނޫސްވެރިން ގާތުގައި ގާސިމް އެއްސެވި އެވެ.
އޭގެ ފަހުންވެސް އިންޑިއާ ސިފައިންނާއި ގުޅޭ ސުވާލެއް އެއްސެވުމުން ގާސިމް ވިދާޅުވީ ވަކި ސުވާލުތަކެއް ކުރަން ސެޓުކޮށްގެން ނޫސްވެރިން އައިނަމަވެސް "ގުއިރޯނު" ގައި ޖެހިވަޑައިނުގަންނަވާނެ ކަމަށެވެ. އޭގެ ފަހުން ކޯފާ އިސްކުރައްވައި ވިދާޅުވީ އެއްވެސް ގައުމެއްގެ މިލިޓަރީ ސިފައިން ތިބުމަކީ ގަބޫލުކަމެއް ނޫންކަމަށެވެ.
އިންޑިއާ ސިފައިން ރާއްޖޭގެ ބައެއް ރަށްތަކުގައި ތިބިކަން ކަށަވަރުވާއިރު އެކަމުގެ ބައެއް އެއްބަސްވުންތައްވެސް ވަނީ ލީކުވެފަ އެވެ. އެހެންނަމަވެސް ސަރުކާރު ކޯލިޝަންގެ ދެވަނައަށް އެންމެ ބޮޑު ހިއްސާ އޮންނަ ޕާޓީގެ ލީޑަރު މިވަނީ އެކަން އެނގިވަޑައިވެސް ނުގަންނަވާކަމަށް ވިދާޅުވެފަ އެވެ.
ގާސިމް އިއްޔެ ނޫސްވެރިންނާއި ބައްދަލުކުރެއްވީ ވޭތުވެދިޔަ ގާތްގަނޑަކަށް ދެ އަހަރެއްހާ ދުވަހު މަޖިލީހުގެ ޖަލްސާތަކަށް ހާޒިރުވެވަޑައިނުގެން ރިޒޯޓުގައި ހުންނެވުމަށްފަހު އެވެ. ގާސިމް ވިދާޅުވީ ރިޒޯޓުގައި ހުންނެވީ ހައިރިސްކު މީހަކަށް ވާތީކަމަށެވެ.
އިއްޔެގެ ނޫސްވެރިންގެ ބައްދަލުވުމުގައި ގާސިމް ވަނީ މީގެ ކުރިން އެޕާޓީގެ އިސް މަގާމުތަކުގައި ތިއްބެވި، އެހެންނަމަވެސް މިހާރު އަމިއްލަފުޅު ޕާޓީއެއް އުފެއްދެވުމުގެ މަސައްކަތުގައި އުޅުއްވާ ދަނގެތި ދާއިރާގެ މެމްބަރު މުހައްމަދު ނާޒިމާއި، ވިލުފުށި ދާއިރާގެ މެމްބަރު އަބްދުﷲ ރިޒާޔަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވައިފަ އެވެ.
