ދައުލަތުގެ ދަރަނި ބޮޑުވަމުން ދާތީ އެކަން ކޮންޓްރޯލްކުރަން ފިޔަވަޅު އަޅާނެ ކަމަށް ސަރުކާރުން ބުނެފި އެވެ.
ރާއްޖޭގެ ދަރަންޏާއި އިގްތިސޯދީ ހާލަތާއި ގުޅޭގޮތުން ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަ ދައްކަވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ މިދިޔަ އަހަރު ކޮވިޑް-19 ގެ ސަބަބުން ރާއްޖޭގެ އާމްދަނީއަށް ވަރަށް ބޮޑަށް އަސަރު ކުރިކަމަށެވެ. އެހެންކަމުން ސަރުކާރަށް ކުރަންޖެހުނު ކޮންމެ ކަމެއް ކޮށްފައިވާ ކަމަށާއި އިގްތިސޯދީ އަދި އިޖުތިމާއީ ދާއިރާއިންވެސް ފިޔަވަޅުތަކެއް އަޅާފައިވާނެކަމަށް މިނިސްޓަރު ވިދާޅުވި އެވެ.
ދުނިޔޭގެ އެހެން ގައުމުތަކުގައި ހަނގުރާމައިގެ ހާލަތުގައި ކަން ކުރާ އުސޫލުން ރާއްޖޭގައި ކޮވިޑްގެ ހާލަތުގައި ކަން ކުރިކަމަށް ވިދާޅުވި އެވެ. އެހެންނަމަވެސް ރާއްޖޭގެ ދަރަނި ކޮންޓްރޯލްކޮށްފައި ބަހައްޓަން އަންނަ އަހަރުން ފެށިގެން ފިޔަވަޅުތަކެއް އަޅާނެކަމަށް އަމީރު ވިދާޅުވި އެވެ. އަންނަ އަހަރުގެ ބަޖެޓު އެކުލަވައިލާނީވެސް އެ އަމާޒަށް ކަމަށް އޭނާ ވިދާޅުވި އެވެ،
ރާއްޖޭގެ ދަރަނި މަތިވިޔަ ނުދޭން އަޅާނެ ފިޔަވަޅުތަކުގެގިތުގައި މިނިސްޓަރު ފާހަގަކުރައްވާފައިވަނީ 2023 ނިމެންވާއިރަށް ދައުލަތުގެ ޑައިރެކްޓް ދަރަނި ޖީޑީޕީގެ ނިސްބަތުން 105 ޕަސެންޓަށް ތިރިކުރުމާއި 2023 ނިޔަލަށް ޕްރައިމަރީ ބަޖެޓު ޑެފިސިޓް ޖީޑީޕީގެ ނިސްބަތުން ފަސް ޕަސެންޓަށް ތިރިކުރުމުގެއިތުރުން ބަޖެޓު ޑެފިސިޓް އަދި ދައުލަތުގެ ދަރަނި އަހަރަކަށްފަހު އަހަރެއް ކުޑަވަމުންދާ މިސްރާބެއްގައި މެދުރާސްތާގައި ބެހެއްޓުމެވެ.
މި ފިޔަވަޅު އަޅަން ނިންމީ ދައުލަތަށް ލިބޭ އާމްދަނީއިން ޑޮމެސްޓިކް ބަޖެޓު ހަމަނުޖެހުން ކަމަށް މިނިސްޓަރު އަމީރު ވިދާޅުވި އެވެ. އެހެންނަމަވެސް މައްސަލަ ހައްލުކުރުމަށް ދަރަނި ނަގަންޖެހޭ ކަމަށާއި އަމައެކަނި އެތެރޭގެ ދަރަނިން އެކަން ނުކުރެވޭނެ ކަމަށްވެސް ވިދާޅުވި އެވެ. އިތުރަށް އޭނާ ވިދާޅުވީ ދެމެހެއްޓެނިވި މިންވަރެއްގައި ދަރަނި ނުހިފެހެއްޓިއްޖެނަމަ ބައިނަލްއަގުވާމީ އިދާރާތަކުން ދަރަނި އިތުރަށް ނެގުމަށް ގޮންޖެހުންތަކެއް އަތުވެދާނެ ކަމަށާއި އިންވެސްޓަރުންގެ އިތުބާރުވެސް ގެއްލިދާނެ ކަމަށެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ ބޮޑެތި އަދަދުތަކުން ލޯނު ނަގައިފަ އެވެ. އެގޮތުން މިއަހަރު ނިމޭއިރު ދަރަނި ގާތްގަނޑަކަށް 100 ބިލިއަން ރުފިޔާއަށް އަރާނެ ކަމަށް ލަފާކުރެވެ އެވެ. މީގެ ތެރެއިން ބޮޑު އަދަދެއް ހިއްސާކުރަނީ އިންޑިއާއިން ނަގާފައިވާ ލޯނުތަކެވެ.
