އދ. ގެ އާންމު މަޖިލީހުގެ 76 ވަނަ ދައުރުގެ ރައީސްގެ މަގާމާއި ރޭ ހަވާލުވެވަޑައިގެންނެވި ރާއްޖޭގެ ފޮރިން މިނިސްޓަރު އަބްދުﷲ ޝާހިދު، އެމެރިކާގެ ނިއުޔޯކުގައި ހުންނަ ކްރިސްޓިއަނުންގެ ފައްޅިއެއްގައި ބޭއްވި އަޅުކަމުގެ ރަސްމިއްޔާތެއްގައި ބައިވެރިވެވަޑައިގެންނެވުމުން ބޮޑެތި ފާޑުކިޔުންތަކެއް އަމާޒުވެއްޖެ އެވެ.
މި ރަސްމިއްޔާތަކީ އދ. ގެ އާންމު މަޖިލީހުގެ އާ ދައުރެއް ފެށުމާއި ގުޅިގެން، އދ އަށް ވެޓިކަން ސިޓީން ކަނޑައަޅާފައިވާ މިޝަނުން އިންތިޒާމުކޮށްގެން ބޭއްވި ރަސްމިއްޔާތެކެވެ. ވެޓިކަން ސިޓީއަކީ ކްރިސްޓިއަނުން ނުވަތަ ނަސޯރާ ދީނުގެ މީހުންގެ މައި ސިޓީ އެވެ. އެމީހުން ދެކެނީ ވެޓިކަން ސިޓީއަކީ އެމީހުންގެ މުގައްދަސް ބިން ކަމުގަ އެވެ.
ހޮލީ ސީގެ ނަމުން ނަން ދީފައިވާ ވެޓިކަން ސިޓީގެ ޔޫއެން މިޝަނުން ވަނީ ސޯޝަލް މީޑިއާގައި އެ ރަސްމިއްޔާތުގެ ފޮޓޯތައް އާންމުކޮށްފަ އެވެ. ޝާހިދު އެ ރަސްމިއްޔާތުގައި ބައިވެރިވެވަޑައިގެންނެވިކަމަށް ވިދާޅުވެ ފޮޓޯތަކުގައި ވަނީ އޭނާ ޓެގުވެސް ކޮށްފަ އެވެ.
މިރަސްމިއްޔާތު ބޭއްވީ ޔޫއެންގެ އާންމު ޖަލްސާތައް ފެށުމުގެ ކުރިންނެވެ. ޝާހިދު މަގާމާއި ހަވާލުވުމުގެ ކުރިން ކްރިސްޓިއަނުންގެ އަޅުކަމަކުން އާ ދައުރު ފެށުމުގެ މަގްސަދުގައި ބޭއްވި މި ރަސްމިއްޔާތުގައި ޝާހިދު ވާހަކަފުޅު ދެއްކެވިކަމަށް ބައިނަލްއަގުވާމީ މީޑިއާތަކުން ވަނީ ބުނެފަ އެވެ.
Prayer Service on the vigil of the opening of the 76th Session of the #UNGA at the church of the Holy Family, #Manhattan #NewYork @UN @UN_PGA @abdulla_shahid @antonioguterres pic.twitter.com/mxaj2lrLZo
— Holy See Mission UN (@HolySeeUN) September 13, 2021
މިކަމާއި ގުޅިގެން ސޯޝަލް މީޑިއާގައި އެކި ފަރާތްތަކުން ޝާހިދަށް ފާޑު ކިޔަކުން ދާއިރު ދީނީ ބައެއް ބޭފުޅުން ވިދާޅުވަނީ މުސްލިމުން އެހެން ދީންތަކުގެ ފައްޅިތަކަށް ޒިޔާރާތް ކުރުމަކީ ހުއްދަ ކަމެއް ކަމަށެވެ. އެހެންނަމަވެސް އަޅުކަމުގެ ހަރަކާތްތަކުގައި ބައިވެރިވެ އެކަން ފާހަގަކޮށް ވާހަކަދެއްކުމަކީ ޝިރުކުގެ އަމަލެއްކަމަށް އިލްމުވެރިން ވިދާޅުވެ އެވެ.
މިމައްސަލައިގައި ބައެއް ދީނީ އިލްމުވެރިން ހިޔާލު ފާޅުކުރި ނަމަވެސް މިފަދަ ސިޔާސީ ކަންކަމާއި ގުޅިގެން އާންމުކޮށް ބަސް ވިދާޅުވާ، ރައީސް އިބްރާހިމް މުހައްމަދު ސޯލިހަށް ތާއީދު ކުރައްވާ ބައެއް މަޝްހޫރު އިލްމުވެރިން އަދި ބަހެއް ވިދާޅު ނުވެ އެވެ.
