ރާއްޖޭގައި ފުޅާ ދާއިރާއެއްގައި ފެތުރިގެން ގޮސްފައިވާ މަސްތުވާތަކެތީގެ މައްސަލައަށް އަވަސް ހައްލެއް ގެނެވިދާނެކަމަށް ގަބޫލު ނުކުރެވޭ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
ނެޝަނަލް ޑްރަގް އޭޖެންސީ (އެންޑީއޭ) ގެ މަސައްކަތްތަކާއި ގުޅޭ ގޮތުން މެމްބަރުންނާއި މައުލޫމާތު ހިއްސާ ކުރައްވަން ނަސީމް ވަނީ މަޖިލީހުގެ ފުރުސަތަކަށް އެދިވަޑައިގެންފަ އެވެ. އެގޮތުން މިއަދު މަޖިލީހަށް ހާޒިރުވެވަޑައިގެން އޭނާ ވަނީ މަސްތުވާތަކެތީގެ މައްސަލައަށް އެޑްރެސްކުރައްވައި ވާހަކަ ދައްކަވައިފަ އެވެ.
ނަސީމް ވިދާޅުވީ މަސްތުވާތަކެތީގެ މައްސަލަ ހައްލުކުރުމުގެ މަރުހަލާ އެންމެ ފުރަތަމަ ފަށަން ޖެހޭނީ ގޭތެރެއިން ކަމަށެވެ. އެގޮތުން މައިންބަފައިންނާއި ގާތް ތިމާގެ މީހުންގެ ހިއްސާ އެކަމުގައި ބޮޑުކަން މިނިސްޓަރު ފާހަގަކުރެއްވި އެވެ. ގޭތެރެއިން މިކަން ނުފެށޭނަމަ ޑްރަގުގެ މައްސަލަ ހައްލުކުރަން އުނދަގޫވާނެ ކަމަށްވެސް ވިދާޅުވި އެވެ.
ގޭތެރެއިން މަސްތުވާތަކެތީގެ މައްސަލަ ހައްލުކުރުމުގެ މަސައްކަތް ފެށޭނަމަ މިމަސައްކަތުގައި ކާމިޔާބު ހޯދިދާނެކަމަށް ވިދާޅުވެ ނަސީމް ވަނީ މަސްތުވުމުގެ ވަބާއަށް އަވަސް ހައްލެއް ނެތްކަމަށް ވިދާޅުވެފަ އެވެ. އަދި މިހާރު ފަށާފައިވާ މަސައްކަތުގެ ތެރޭގައި ގިނަ ކަންކަން ދަސްކުރަމުން ގެންދަވާކަމަށްވެސް ވިދާޅުވި އެވެ.
މިނިސްޓަރު އިތުރަށް ވިދާޅުވީ މަސްތުވާތަކެތީގެ މައްސަލަ ހައްލުކުރުމުގެ ގޮތުން މިހާރު ފަށާފައިވާ މަސައްކަތްތަކުގެ ތެރެއިން ކަމާއި ގުޅުންހުރި ފަރާތްތަކާއިއެކު މަޝްވަރާތައް ކުރިއަށް ގެންދަވާ ކަމަށާއި އޭގެ ތެރޭގައި މުޖުތަމައުގެ ތެރެއިން ގެންނަންޖެހޭ ބަދަލުތައްވެސް ގެންނާނެ ކަމަށެވެ.
ޑްރަގް އޭޖެންސީ މީގެ ކުރިން އޮންނަނީ ޖެންޑާ މިނިސްޓްރީގެ ދަށުގަ އެވެ. އެހެންނަމަވެސް ދާދި ފަހުން ވަނީ އެތަން ހެލްތުގެ ދަށަށް ބަދަލުކޮށްފަ އެވެ. މިހާރު އެ މިނިސްޓްރީން ދަނީ އެންޑީއޭއަށް އިސްލާހީ ބަދަލުތަކެއް ގެނައުމުގެ މަސައްކަތް ކުރަމުންނެވެ.
