މިއަދު ފާހަގަކުރަމުންދާ ބައިނަލްއަގުވާމީ ޑިމޮކްރަސީ ދުވަހާއި ދިމާކޮށް މޯލްޑިވްސް ނެޝަނަލް ޕާޓީ (އެމްއެންޕީ) ރަޖިސްޓްރީ ކުރަން ހުށަހަޅައިފި އެވެ.
ދަނގެތި ދާއިރާގެ މެމްބަރު މުހައްމަދު ނާޒިމާއި، ވިލުފުށި ދާއިރާގެ މެމްބަރު އަބްދުﷲ ރިޔާޒު އިސްވެ ހުންނަވައި އުފައްދަވާ އެމްއެންޕީ ރަޖިސްޓްރީ ކުރަން އިލެކްޝަންސް ކޮމިޝަނަށް ހުށަހެޅީ 5،000 އަށްވުރެއް ގިނަ މެމްބަރުންގެ ފޯމާއިއެކު އެވެ.
މިކަމާއި ގުޅިގެން އެމްއެންޕީން މިއަދު ނެރުނު ބަޔާނެއްގައި ބުނީ އެމްއެންޕީން އިލެކްޝަނަށް ހުށަހެޅި ފޯމުތަކުގައި ރާއްޖޭގެ ހުރިހާ ރަށަކަށް ނިސްބަތްވާ މީހުން ހިމެނޭނެ ކަމަށެވެ. އެޕާޓީން ބުނީ އާ ޕާޓީއެއް އުފެއްދުމުގެ ބޭނުމަކީ ދިވެހިންގެ ތެރޭގައި ގައުމީ ފިކުރު އާލާކޮށް ދިވެހިން އެދޭ ކަންކަން ފުރިހަމައަށް ހާސިލް ކުރުން ކަމަށެވެ. އަދި ގާނޫނީ ގޮތުން ލިބިދޭ އެންމެހައި ބާރާއި އިހުތިޔާރާއި ހައްގުތައް ބޭނުންކޮށް 2023 ވަނަ އަހަރުގެ އިންތިހާބު ކާމިޔާބު ކުރުމަކީ އެމްއެންޕީގެ މަގްސަދެއްކަމަށް އެޕާޓީން ބުންޏެވެ.
މީގެ އިތުރުން އިލެކްޝަންސް ކޮމިޝަނުން ހުއްދަ ދިންހާ އަވަހަކަށް އެމްއެންޕީ އުފެއްދުމުގެ ޖަލްސާ ބާއްވާނެ ކަމަށާއި އުއްމީދަކީ ވީހާވެސް އަވަހަށް ސިޔާސީ ޕާޓީތަކުގެ ދަފްތަރުގައި ހިމެނުން ކަމަށެވެ.
"އަދި (އުއްމީދަކީ) މިހިނގާ 2021 ވަނަ އަހަރު ނިމުމުގެ ކުރިން ދިހަ ހާސް މެމްބަރުން ހަމަކޮށް އެމްއެންޕީއަކީ ދިވެހިރާއްޖޭޣައި ހިނގާ އެންމެ ވަރުގަދަ ސިޔާސީ ހަރަކާތައް ހެދުން"
- އެމްއެންޕީގެ ބަޔާން
އެޕާޓީން ވަނީ ގައުމީ ފިކުރަށް ތާއީދުކުރާ ހުރިހާ ރައްޔިތުން ޕާޓީއަށް ސޮއިކުރަން ދައުވަތު ދީފަ އެވެ.
ރިޔާޒުއާއި ނާޒިމް މީގެ ކުރިން ތިއްބެވީ ޖުމްހޫރީ ޕާޓީގަ އެވެ. އާ ޕާޓީއެއް އުފެއްދެވުމަށް ޖޭޕީން ވަކިވުމާއި ގުޅިގެން އެޕާޓީގެ ލީޑަރު ގާސިމް އިބްރާހިމް ވަނީ އެ ދެބޭފުޅުންނަށް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ގާސިމް ވިދާޅުވީ ނާޒިމާއި ރިޔާޒުގެ ސިޔާސީ ކަންކަމަށް މިލިއަނުން ހަރަދު ކުރެއްވި ކަމަށާއި އެޕާޓީއަށާއި ގާސިމަށް އެ ދެބޭފުޅުން ހަރާންކޯރު ވެފައިވާ ކަމަށެވެ.
