ތ. ހިރިލަންދޫގައި ހުންނަ އެރަށު ސްކޫލުގައި ބެލެނިވެރިން ނިކުމެ ތަޅު އަޅުވައިފި އެވެ.
މައުލޫމާތު ލިބިފައިވާ ގޮތުގައި އެސްކޫލުގެ ބެލެނިވެރިން ދަނީ ސްކޫލު ކުރިމަތީގައި މުޒާހަރާވެސް ކުރަމުންނެވެ. އެރަށުން "ހަމައެމްވީ" އާއި ވާހަކަ ދެއްކި މީހަކު ބުނީ ސްކޫލުގައި ތަޅު އެޅުވީ ގިނަ މައްސަލަތަކަކަށް ހައްލު ނުލިބި ގިނަ ދުވަސް ވުމާއި ގުޅިގެންނެވެ.
މިއަދު ހެނދުނު ހިރިލަންދޫ ސްކޫލަށް ކުދިން ކިޔަވަން ގެންދިޔަ އެވެ. އެހެންނަމަވެސް އިންޓަވަލް ފަހުން ކުދިން ނުގެންދެ އެވެ. އޭގެ ފަހުން ބެލެނިވެރިން ނިކުމެ ސްކޫލުގައި ތަޅު އެޅުވީ ހެނދުނު ގާތްގަނޑަކަށް 9:30 ހާއިރު އެވެ.
ސްކޫލު ކުރިމަތީގައި ބެލެނިވެރިން އިހުތިޖާޖު ކުރާއިރު ސްކޫލުގައި ހުރި ގިނަ މައްސަލަތަކެއް ހައްލު ނުވެ ދަރިވަރުންގެ ކިޔެވުމަށްވެސް އެކަމުގެ ސަބަބުން ބުރޫ އަރާކަމަށް ވެއެވެ. ހިރިލަންދޫ ސްކޫލަކީ ތ. އަތޮޅުގައި އެންމެ ގިނަ ދަރިވަރުން ތައުލީމު ހާސިލް ކުރަންދާ ސްކޫލެވެ. އެހެންނަމަވެސް އެ ސްކޫލުގެ ފެންވަރު ވަރަށް ދަށްކަމަށް ސްކޫލު ބެލެނިވެރިން ބުނެ އެވެ.
ސްކޫލުގެ އިމާރާތް ވަރަށް ބޮޑަށް ހަލާކުވެފައިވާއިރު ބެލެނިވެރިން ކަންބޮޑުވުން ފާޅުކުރީ ކްލާސްރޫމުތަކަށް ވިއްސާރަ ވެހި ކުދިން ތެމުމާއި ގުޅިގެންނެވެ. ހިރިލަންދޫއަށް މިއަދު ދަނީ ވަރަށް ބޯކޮށް ވާރޭ ވެހެމުންނެވެ. މީގެ ކުރިންވެސް މިމައްސަލައިގައި ބެލެނިވެރިން ކަންބޮޑުވުން ފާޅުކޮށްފައިވެ އެވެ.
މައްސަލަ ހައްލުނުވެ ގިނަ ދުވަސްތަކެއް ވެފައިވާއިރު އެރަށަށް ބޯކޮށް ވާރޭ ވެހި ވައިޖެހޭ ދުވަހެއްގައި ޕޭޕަރުތައް ވަޔާ ގޮސް ކިޔަވަން އުނދަގޫވާ ހިސާބަށް ދެ އެވެ.
މީގެ އިތުރުން ސްކޫލގެ ފާހާނާގެ ދަތިކަމާއި އެނޫންވެސް ބަޖެޓުގެ ދަތިކަންވެސް އެބަ ހުއްޓެވެ. ހިރިލަންދޫ ސްކޫލުގައި ހުރި މައްސަލަތައް ކަމާއިބެހޭ ފަރާތްތަކާއި ހިއްސާކޮށްފައިވީނަމަވެސް އެއްވެސް ހައްލެއް އެކަމަށް ގެނަސްފައެއް ނުވެ އެވެ.
މިމައްސަލަ ފެންމަތިވުމާއިއެކު އެޑިއުކޭޝަން މިނިސްޓްރީން ބުނީ މައްސަލައިގެ ތަފްސީލު ފޮނުވަން ސްކޫލުގައި މިއަދު އެދިފައިވާނެ ކަމަށެވެ.
