ރާއްޖޭގައި މީހުން ދިރިއުޅޭ ތަންތަނުގައި ބޯހިމެނުން އަންނަ 2022 ވަނަ އަހަރުގެ ސެޕްޓެމްބަރު މަހު ކުރިއަށް ގެންދަން ނިންމާފައިވާކަމަށް ހައުސިންގް އެންޑް ޕްލޭނިންގް މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން މިއަދު ބޭއްވި ރަސްމިއްޔާތުގައި ދެއްވި ވީޑިއޯ މެސެޖެއްގައި އަސްލަމް ވިދާޅުވީ ބޯހިމެނުން ކުރިއަށް ގެންދާނީ އަންނަ އަހަރުގެ ސެޕްޓެމްބަރު މަހުގެ 17 ވަނަ ދުވަހުން 30 ވަނަ ދުވަހުގެ ނިޔަލަށް ކަމަށެވެ. ބޯހިމެނުމަކީ ގައުމީ ތަރައްގީގެ މަޝްރޫއުތައް ރާވައި ހިންގަން ބޭނުންވާ މުހިންމު އަސާސީ މައުލޫމާތެއް ކަމަށް އަސްލަމް ވިދާޅުވި އެވެ.
އަންނަ އއަހަރުގެ ބޯހިމެނުން ޝިއާރަކީ "އަހަރެންގެ ބޯހިމެނުން" މިއެވެ.
އެހެން ފަހަރުތަކާއި ހިލާފަށް އަންނަ އަހަރުގެ ބޯހިމެނުމުގައި ރާއްޖޭގެ މީހުން ދިރިއުޅޭ ތަންތަނުގެ އިތުރުން އިގްތިސޯދީ މަސައްކަތްތަކުގެ ބޯހިމަނަންވެސް ވަނީ ނިންމައިފަ އެވެ.
އެގޮތުން އިގްތިސޯދީ މަސައްކަތްތަކުގެ ބޯހިމެނުން އަންނަ އަހަރުގެ ޖުލައި މަހު ފަށާނެ އެވެ. މިމަސައްކަތް ކުރިއަށް ގެންދާނީ އޮންލައިންކޮށް ފޯމެއް ފުރިހަމަ ކުރެވޭ ގޮތަށެވެ. އޮންލައިންކޮށް ފޯމު ނުފުރާނަމަ އެފަދަ ތަންތަނުގެ މައުލޫމާތު އެއްކުރަން ފަށާނީ ސެޕްޓެމްބަރު މަހު ބޯހިމެނުން ކުރިއަށް ގެންދާ މުއްދަތުގަ އެވެ.
މިއަދުގެ ރަސްމިއްޔާތުގައި ޕޮޕިއުލޭޝަން އެންޑް ސޯޝަލް ސްޓެޓިސްޓިކްސްގެ ހެޑު ފާތިމަތު ރިޔާޒާ ވިދާޅުވީ ބޯހިމެނުމުގެ މަސައްކަތަށް 4،300 އެއްހާ އެނިއުމޭޓަރުން ބޭނުންވާނެ ކަމަށެވެ. އޭގެ ތެރެއިން 2،100 އެނިއުމޭޓަރުން ބޭނުންވާނީ މާލެ ސަރަހައްދަށް ކަމަށް އޭނާ ވިދާޅުވި އެވެ.
އަންނަ މަހުގެ 20 ވަަނަ ދުވަހު ފާހަގަކުރާ ގައުމީ ތަފާސް ހިސާބުތަކުގެ ދުވަހާއި ދިމާކޮށް އެނިއުމޭޓަރުން ހޯދަން އިއުލާންކުރަންވެސް ވަނީ ނިންމައިފަ އެވެ. ބޯހިމެނުމުގެ މައުލޫމާތު އާންމު ކުރާނީ އަންނަ އަހަރުގެ އޮކްޓޯބަރު މަހުގެ 6 ވަަނަ ދުވަހު އެވެ. ދާއިމީ ނަތީޖާ އިއުލާން ކުރާނީ އެމަހުގެ 20 ވަނަ ދުވަހު އެވެ.
އެންމެ ފަހުން ރާއްޖޭގައި ބޯހިމެނީ 2014 ވަނަ އަހަރު އެވެ. އޭރު ރާއްޖޭގައި ދިރިއުޅޭ މީހުންގެ އާބާދީ އަކީ 402،071 މީހުންނެވެ.
