2015 ވަނަ އަހަރުގެ އޮކްޓޯބަރު މަހުގެ 25 ވަނަ ދުވަހު، މިހާރުގެ ޕްރޮސެކިއުޓާ ޖެނެރަލް ހުސައިން ޝަމީމް އުފުލިކަމަށް ބުނާ ކަޅު ދަބަހުގެ ތަފްސީލު ހާމަކުރާނެ ކަމަށް ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
މަޝްހޫރު ގާނޫނީ ވަކީލު ޝަމީމް އޭރު ގެންދެވީ ކުރީގެ ނައިބުރައީސް އަހުމަދު އަދީބުގެ ދިފާއީ ވަކީލުކަން ކުރައްވަމުންނެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި ފިނިފެންމާ ލޯންޗު ގޮއްވައިލި މައްސަލައިގައި އަދީބުގެ މައްޗަށް އޭރު ބޮޑެތި ތުހުމަތުތަކެއް ކުރެވުނެވެ. އޭގެ ފަހުން އެމްއެމްޕީއާރުސީ ބޮޑު ހިޔާނާތުގެ މައްސަލައިގައިވެސް އިސްކޮށް އުޅުއްވިކަމުގެ ތުހުމަތު ކުރެވި، ފަހުން އަމިއްލަފުޅަށް އެކަމަށް އަދީބު ވަނީ އިއުތިރާފުވެސް ވެފަ އެވެ.
އަދީބުގެ އެންމެ އަރިސް އެއް ބޭފުޅާ ޝަމީމް ޕީޖީގެ މަގާމުގައި ހުންނަވައި ދައުލަތާއިއެކު އެއްބަސްވުމެއް ހަދައި އަބަދު ލުއިކޮށްދޭން ނިންމީ ރައީސް އިބްރާހިމް މުހައްމަދު ސޯލިހުގެ ސަރުކާރުގަ އެވެ. ސިއްހީ މައްސަލަތަކެއްގެ ސަބަބުންކަމަށް ބުނެ އަދީބު ޖަލު ހުކުމް ތަންފީޒު ކުރައްވަމުން ގެންދަވަނީ ގޭގައި ހުންނަވައިގެންނެވެ.
ޖިންސީ ގޯނާގެ ތުހުމަތުތަކެއް ކުރެވިފައި ވަނިކޮށް އިނގިރޭސިވިލާތަށް ވަޑައިގެން ހުންނެވި އަލީ ވަހީދު ގެންދަވަނީ ޕީޖީ ޝަމީމަށް ބޮޑެތި ކޮރަޕްޝަންގެ ތުހުމަތުތަކެއް ކުރައްވަމުންނެވެ. އެގޮތުން އަލީ ވަހީދު ރޭ ވިދާޅުވީ އިންސާނެއްގެ މިނިވަންކަން ނުހައްގުން ހިފެހެއްޓުމުގެ ޖާގަ ދައުލަތުގެ އެއްވެސް މުއައްސަސާއަކަށް ނޯންނާނެ ކަމަށެވެ. އަދި ރީފޯމުގެ ނަމުގައި އެއް ލޯފާމަކަށް ޖުޑިޝަރީ ޕްރައިވަޓައިޒްކޮށް މިސަރުކާރުން ކިލަނބު ކޮށްލާފައިވާކަމަށް އޭނާ ވިދާޅުވި އެވެ.
މީގެ އިތުރުން ވިދާޅުވީ ޕީޖީ ޝަމީމް ގެންދެވިކަމަށް ބުނާ ކަޅު ދަބަހުގެ ތަފްސީލު ހަފްތާއެއްގެ ތެރޭގައި ހާމަކުރައްވާނެ ކަމަށެވެ.
2015 ވަނަ އަހަރު އަދީބުގެ ދިފާއީ ވަކީލުކަން ކުރެއްވުމުގެ އުޖޫރައެއްގެ ގޮތުން ޝަމީމަށް ބޮޑެތި އަދަދުތަކުން ފައިސާ ލިބުނުކަމަށް މީގެ ކުރިންވެސް އެކި ފަރާތްތަކުން ވަނީ ތުހުމަތުކޮށްފަ އެވެ. އަދި އެފައިސާއަކީ އެމްއެމްޕީއާރުސީ ހިޔާނާތުގެ ފައިސާކަން ޝަމީމަށް އޭރުވެސް އެނގިވަޑައިގަންނަވާކަމަށްވެސް ތުހުމަތު ކުރެ އެވެ. އެހެންނަމަވެސް ޝަމީމް އެކަން ދޮގުކުރައްވަ އެވެ.
އަލީ ވަހީދު އިތުރަށް ވިދާޅުވީ ކްރިމިނަލް ކޯޓުން ރައީސް ޔާމީނަށް ހުކުމްހުރި ތިން ފަނޑިޔާރުންގެ އަގުލަބިއްޔަތު އިއުތިރާފު ބަހުން ރާއްޖޭގައި މިވަގުތު މިނިވަން ޝަރުއީ ނިޒާމެއް ނެތްކަމަށާއި، އޮތީ ޝަމީމީ ނިޒާމެއް ކަން ވަރަށް ސާފުކަމަށެވެ. އަދި އިތުރު އަޑުއެހުންތަކާއި ބަހަނާތައް ނުދައްކައި ރައީސް ޔާމީން މިނިވަންކުރަންޖެހޭ ކަމަށްވެސް އަލީ ވަހީދު ވަނީ ވިދާޅުވެފަ އެވެ.
ޖުމްހޫރީ ޕާޓީގައި ހުންނެވި އަލީ ވަހީދު މިނިސްޓަރުކަމަށް އައްޔަނު ކުރެއްވީ އެޕާޓީގެ ސްލޮޓެއްގަ އެވެ. ދާދިފަހުން ޖޭޕީގެ ލީޑަރު ގާސިމް އިބްރާހިމް ވަނީ އަލީ ވަހީދު ފްރޭމް ކުރެވިފައިވެދާނެއޭ ހިތަށް އަރުއްވާކަމަށް ވިދާޅުވެފަ އެވެ. އަލީ ވަހީދުވެސް ވިދާޅުވަނީ އޭނާގެ މައްޗަށް ޖިންސީ ގޯނާގެ ތުހުމަތުތަކެއް ކޮށް މަގާމުން ވަކިކުރީ ބަޔަކު ރާވައިގެން އޭނާގެ ސިޔާސީ ހަޔާތް ދުއްވައިލުމުގެ މަގްސަދުގައި ކަމަށެވެ.
