ސަރުކާރުގެ މައި ހޮސްޕިޓަލް، އިންދިރާ ގާންދީ މެމޯރިއަލް ހޮސްޕިޓަލުގެ 500 އެއްހާ ޑޮކްޓަރުންނާއި ނަރުހުން ސޮއިކޮށް ހުށަހެޅި ޕެޓިޝަން ދިރާސާ ކުރުމުގެ މަސައްކަތް ފަށާފައިވާކަމަށް ރައީސް އޮފީހުން ބުނެފި އެވެ.
ރައީސް އޮފީހުގެ ތަރުޖަމާނު މަބުރޫކު އަޒީޒު ވިދާޅުވީ ރައީސް އިބްރާހިމް މުހައްމަދު ސޯލިހަށް އެޑްރެސްކޮށް ހުށަހެޅި އެ ޕެޓިޝަން ރައީސް އޮފީހަށް ލިބިފައިވާކަމަށެވެ. ޕެޓިޝަންގައި ހުށަހަޅާފައިވާ ކަންކަމާއި ގުޅޭގޮތުން ވަކި ގޮތެއް ނިންމާނީ އެކަން ދިރާސާ ކުރުމަށްފަހު ކަމަށް މަބުރޫކު ވިދާޅުވި އެވެ.
އެފަދަ ޕެޓިޝަނެއް ދިރާސާ ކުރާނީ ހަމައެކަނި ރައީސް އޮފީހުން ނޫން ކަމަށާއި، ކަމާއި ގުޅުންހުރި އެހެނިހެން ފަރާތްތަކުގެ މަޝްވަރާވެސް އެކަމުގައި ހޯދާޏެ ކަމަށް މަބުރޫކު ވިދާޅުވި އެވެ. ދިރާސާ ނިންމާނެ ވަކި ތާރީހެއް އޭނާ ވިދާޅެއް ނުވެ އެވެ.
އައިޖީއެމްއެޗްގެ ޑޮކްޓަރުންނާއި ނަރުހުންގެ ތެރެއިން 491 މީހަކު އިއްޔެ ހުށަހެޅި ޕެޓިޝަންގައި ވަނީ ސޮއިކޮށްފަ އެވެ. އެޕެޓިޝަންގައި އެދިފައިވަނީ ސިއްހީ ދާއިރާގެ މުވައްޒަފުންގެ މަގާމުގެ ކުރިއެރުން ދިނުން ހުއްޓާލާފައި އޮތް އޮތުން ނިމުމަކަށް ގެނައުމަށެވެ. އެގޮތުން ޕެޓީޝަންގައި ވަނީ މަގާމުގެ ކުރިއެރުން ދިނުމަށް ކުރިންވެސް އޮންނަ ގޮތަށް ރުޖޫއަކުރަން އެދިފަ އެވެ.
ސިއްހީ ދާއިރާގެ މުވައްޒަފުންގެ ޕެޓިޝަނެއް ރައީސް ސޯލިހަށް ހުށަހަޅާފައިވާއިރު މިހަފްތާގެ ތެރޭގައި ގައުމީ އެއާލައިން، މޯލްޑިވިއަންގެ ޕައިލެޓުންތަކެއް ވަނީ މުޒާހަރާއަށް ނިކުމެ ކޮވިޑާއި ގުޅިގެން ކުޑަކުރި މުސާރަތައް އަލުން ރުޖޫއަކޮށްދޭން އެދިފަ އެވެ. އެއާއެކު ރައީސް ސޯލިހު ވަނީ ޕައިލެޓުންނާއި ބައްދަލުކުރައްވައި އެމީހުންގެ ޝަކުވާތައް އައްސަވައިފަ އެވެ.
ޕައިލެޓުންގެ މުސާރަ ބޮޑުކުރަން މޯލްޑިވިއަންގެ މެނޭޖްމެންޓުން ނިންމައި އެކަމަށް އެއްބަސްވެފައިވާކަމަށް ޕައިލެޓުން ވަނީ ބުނެފަ އެވެ.
