އިލެކްޝަންސް ކޮމިޝަންގެ ރައީސްގެ މަގާމަށް އަލަށް އިންތިހާބުވި ކުރިންވެސް އެކޮމިޝަންގެ ރައީސްކަން ކުރެއްވި ފުއާދު ތައުފީގަށް ތައުރީފު ކުރައްވައި ރައްޔިތުންގެ މަޖިލީހުގެ ރައީސް މުހައްމަުދ ނަޝީދު ވާހަކަ ދައްކަވައިފި އެވެ.
2013 ވަނަ އަހަރު ނަޝީދު ބަލިވި ރިޔާސީ އިންތިހާބު ބޭއްވިއިރު އީސީގެ ރައީސްކަމުގައި ހުންނެވީ ފުއާދު އެވެ. އޭރު ފުއާދުގެ އިހްލާސްތެރިކަމެއް ނެތްކަމާއި އިންތިހާބު އޮޅުވައިލިކަމުގެ ތުހުމަތު ފުއާދަށް އެންމެ ބޮޑަށް ކުރެއްވި އެއް ބޭފުޅަކީ ރައީސް ނަޝީދެވެ.
މިއަދު ކުރެއްވި ޓުވީޓެއްގައި ނަޝީދު ވިދާޅުވީ ފުއާދަށް ފުރިހަމައަށް އިތުބާރު ކުރައްވާ ކަމަށެވެ. އަދި ފުއާދުގެ އިހްލާސްތެރިކަމާއި ތެދުވެރިކަމާއިމެދު ޝައްކު ނުކުރައްވާ ކަމަށްވެސް ނަޝީދު ވިދާޅުވި އެވެ.
ނުފޫޒެއް ނެތި މިނިވަންކަމާއިއެކު ހިންގޭ އިންތިހާބުތަކަކީ ޑިމޮކްރަސީއާ ޖުޑީޝަރީއަށް ވަރަށް މުހިންމު އެއްޗެއް ކަމަށްވެސް ނަޝީދު ވިދާޅުވި އެވެ.
ފުއާދު އީސީގެ މެމްބަރުކަން ކުރެއްވީ 2008 އާއި 2009 ވަނަ އަހަރު އެވެ. އޭގެ ފަހުން 2014 ވަނަ އަހަރުގެ ނިޔަލަށް އެ ކޮމިޝަންގެ ރައީސްގެ މަގާމުވެސް ފުރުއްވި އެވެ. އޭގެ ފަހުން އީސީން އިސްތިއުފާ ދެއްވައި އަލުން ކޮމިޝަނަށް އައްޔަނުވީ މިދިޔަ އަހަރު އެވެ.
އީސީގެ ރައީސް އިސްތިއުފާ ދެއްވުމާއި ގުޅިގެން ފުއާދު އިއްޔެ އެ މަގާމަށް އިންތިހާބުވީ އެ ކޮމިޝަންގެ މެމްބަރުންގެ އިއްތިފާގުންނެވެ.
