އުމުރުން 14 އަހަރުގެ ކުއްޖަކު ރަހީނު ކުރިކަމަށް ބެލެވޭ މައްސަލައެއް ފުލުހުން ބަލަން ފަށައިފި އެވެ.
ފުލުހުން ބުނީ ކުޑަ ކުއްޖަކު ގެއްލިގެން އެ އިދާރާއަށް ރިޕޯޓު ކުރީ ރޭގެ ވަގުތެއްގައި ކަމަށެވެ. އަދި ރިޕޯޓު ކުރިތާކުޑަ ވަގުތުކޮޅެއްގެ ތެރޭގައި އެ ކުއްޖާ ފެނިފައިވާކަމަށް ފުލުހުން ބުންޏެވެ.
ގެއްލިގެން އުޅެނިކޮށް ރިޕޯޓުކުރީ އުމުރުން 14 އަހަރުގެ ފިރިހެން ކުއްޖެކެވެ.
ކުއްޖާ ފެނުނުއިރު އެއްވެސް އަނިޔާއެއް ލިބިފައި ނުވާކަމަށާއި ހާލު ރަނގަޅުކަމަށް ފުލުހުން ބުންޏެވެ. އެހެންނަމަވެސް އެމައްސަލައިގައި ބަލަންޖެހޭ އިތުރު ކަންކަން ބަލަމުން ދާކަމަށް ފުލުހުން ބުންޏެވެ.
14 އަހަރުގެ ކުއްޖާ ގެއްލުނު ހާދިސާގައި އެކުއްޖާ ރަހީނު ކުރިކަމަށް ތުހުމަތު ކުރެވެ އެވެ. މައުލޫމާތު ލިބިފައިވާ ގޮތުގައި ފުލުހުންވެސް މިމައްސަލަ ބަލަމުންދަނީ ރަހީނު ކުރި މައްސަލައެއްގެ ގޮތުގަ އެވެ.
މިމައްސަލައިގައި ރަހީނު ކުރިކަމަށް ބުނާ ކުޑަކުއްޖާއަކީ މީގެ ކުރިން މަރާލައި ހުޅުމާލެ މޫދަށް އެއްލާލާފައި އޮތް 13 އަހަރުގެ ކުއްޖާގެ މައްސަލައާއި ގުޅުންއޮތް ކުއްޖެއްކަމަށް މައުލޫމާތު ލިބެ އެވެ. އެހެންނަމަވެސް މިކަން ފުލުހުން ކަށަވަރުކޮށެއް ނުދެ އެވެ.
