އަންނަ ހޮނިހިރު ދުވަހު ބާއްވަން ތައްޔާރުވަމުންދާ މޯލްޑީވިއަން ޑިމޮކްރެޓިކް ޕާޓީ (އެމްޑީޕީ) ގެ އެތެރޭގެ އިންތިހާބުގައި 92،743 މީހުންނަށް ވޯޓު ލެވޭކަމަށް އެޕާޓީން ބުނިއިރު ވޯޓު ލެވޭ މީހުންގެ ލިސްޓުގައި އިދިކޮޅު ޕީޕީއެމްއަށް ނިސްބަތްވާ ކައުންސިލަރުންވެސް ހިމެނިއްޖެ އެވެ.
ވޯޓު ލެވޭ މީހުންގެ ލިސްޓު އާންމު ކުރީ މިމަހުގެ 11 ވަނަ ދުވަހު އެވެ. އެލިސްޓަށް ޝަކުވާ ހުށަހެޅުމަށް މުއްދަތު ދިނުމަށްފަހު އިސްލާހުކޮށްފައިވާ ލިސްޓު އަލުން ވަނީ އާންމު ކޮށްފަ އެވެ.
އަލުން ލިސްޓު އާންމު ކުރިއިރު އައްޑޫ މީދޫ ދާއިރާއި ވޯޓު ލެވޭކަމަށް ބުނެ އެދާއިރާގެ ޕީޕީއެމް ކައުންސިލަރެއްގެ ނަންވެސް ވަނީ ހިމެނިފަ އެވެ. މިކަން މީދޫ ދާއިރާގެ އެމްޑީޕީ މަޖިލިސް މެމްބަރު ރޮޒައިނާ އާދަމް ވަނީ ސަމާލުކަމަށްވެސް ގެންނަވައިފަ އެވެ.
ކުރިން ލިސްޓު އާންމުކުރިއިރުވެސް އެހެން ބައެއް ޕާޓީތަކުގެ މެމްބަރުންނަށް ވޯޓު ލެވޭކަމަށް އޮތްކަން ފާހަގަކުރެވި އެކަން އިސްލާހު ކުރިކަމަށް އެމްޑީޕީން ބުންޏެވެ.
އެމްޑީޕީގެ ކޮންމެ ފަހަރެއްގެ އެތެރޭގެ އިންތިހާބާއި ދިމާކޮށް ގިނަ ބަޔަކު އެޕާޓީއާއި ގުޅޭކަން މީގެ ކުރިންވެސް އޮތީ ފާހަގަކުރެވިފަ އެވެ. މިކަން މިގޮތަށް ކުރަނީ ގިނަ ވޯޓު ހޯދުމުގެ މަގުސަދުގަ އެވެ.
މިފަހަރުގެ އިންތިހާބުގައި ނިކުންނަނީ އެމްޑީޕީގެ ރައީސް މުހައްމަދު ނަޝީދުގެ ތާއީދު ހޯއްދަވައިގެން ނިކުންނަ ކެނޑިޑޭޓުންނާއި އަދި ރައީސް އިބްރާހިމް މުހައްމަދު ސޯލިހުގެ ތާއީދު ހޯއްދަވައިގެން ނިކުންނަ ކެނޑިޑޭޓުންނެވެ. އެޕާޓީގެ އެތެރެ ވަަރށް ބޮޑަށް ބައިބައިވެފައިވާއިރު މިއީ އެޕާޓީގެ ތެރޭގައި ބާއްވާ އެންމެ ބޮޑު އިންތިހާބުވެސް މެއެވެ.
މި އިންތިހާޞުގައި 733 ކެނޑިޑޭޓަކު އެކި ދާއިރާތަކަށް ވާދަ ކުރެ އެވެ. އޭގެ ތެރެއިން 165 ކެނޑިޑޭޓުންނަށް މިހާރުވެސް ވަނީ ދާއިރާތައް ކަށަވަރުވެފަ އެވެ. އެއީ އެހެން ކެނޑިޑޭޓަކު އެދާއިރާތަކަށް ވާދަ ނުކުރާތީ އެވެ.
