ކުރީގެ ރައީސް އަބްދުﷲ ޔާމީންގެ ސަރުކާރުގައި އާއިލާއާއިއެކު އިނގިރޭސިވިލާތަށް ވަޑައިގެން ހުންނެވުމަށްފަހު 2018 ވަނަ އަހަރުގެ ބޭއްވި އިންތިހާބުގައި ރައީސް އިބްރާހިމް މުހައްމަދު ސޯލިހަށް ކާމިޔާބު ވުމާއިއެކު، ރާއްޖެ ވަޑައިގެންނެވީ ދިފާއީ ވަޒީރުކަން ދެއްވާނެ ކަމަށް ރައީސް ސޯލިވު ވިދާޅުވުމުންކަމަށް ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
ޖިންސީ ގޯނާގެ ތުހުމަތުތަކެއް ކުރެވުމާއިއެކު މިނިސްޓަރުގެ މަގާމުން ވަކިކުރައްވައި، މާގިނަ ދުވަހެއް ނުވެ ދައުލަތުން ދައުވާތަކެއް އުފުލައި ޝަރީއަތްވެސް ފަށާފައި ވަނިކޮށް އަލީ ވަހީދު އިނގިރޭސިވިލާތަށް ވަޑައިގެންނެވި އެވެ. އެހެންނަމަވެސް އަލީ ވަޑައިގެންނެވީ ދައުލަތުގެ އެކި މުއައްސަސާތައް ވާގިވެރިވެގެންކަމަށް ތުހުމަތު ކުރެވެ އެވެ. އެފަދަ މޭރުމަކުން އަލީ ވަހީދުވެސް މީގެ ކުރިން ވާހަކަ ދެއްކެވި އެވެ.
މިރޭ ކުރިއަށް ގެންދިޔަ ނޫސްވެރިންގެ ބައްދަލުވުމެއްގައި އަލީ ވިދާޅުވީ ރައީސް ސޯލިހު ވެރިކަމަށް ގެންނެވުމަށް ވަަރަށް ގިނަ މަސައްކަތް ކުރެއްވި ކަމަށާއި އޭގެ ކުރިންވެސް އެމަނިކުފާނާއިއެކު ވަރަށް ގިނަ ދުވަހު ސިޔާސީ މަސައްކަތް ކުރެއްވި ކަމަަށެވެ. އަދި ވެރިކަމަށް ވަޑައިގެންނެވުމުން ދިފާއީ ވަޒީރުކަން އަރުވާނެ ކަމަށާއި އިތުބާރު ކުރައްވާކަމަށް ރައީސް ސޯލިހު ވިދާޅުވިކަމަށް އަލީ ވިދާޅުވި އެވެ.
އެހެންނަމަވެސް ހުވާ ކުރަން 48 ގަޑިއިރަށް ވީއިރުވެސް ކެބިނެޓުގައި ހިމެނިވަޑައިގަންނަވާކަމުގެ އެއްވެސް މައުލޫމާތެއް ލިބިފައި ނުވާތީ އެކަމަށް ތައްޔާރުވެވަޑައި ނުގަންނަވާކަމަށް އަލީ ވިދާޅުވި އެވެ. އޭގެ ފަހުން ރައީސް ސޯލިހު ހުވާ ކުރައްވަން މަދު ވަގުތުކޮޅަކަށް ވެފައި ވަނިކޮށް ބައްދަލުކުރައްވައި ވިދާޅުވީ ދިފާއީ ވުޒާރާ ދެއްވެން ނެތްކަމަށާއި އެހެންނަމަވެސް މިވަގުތަށް ޓޫރިޒަމް މިނިސްޓްރީ ދެއްވާނެ ކަމަށެވެ. އަދި އެއީ ވަރަށް މުހިންމު ވުޒާރާއެއް ކަމަށާއި އަލީއަށް ވަރަށް އިތުބާރު ކުރައްވާކަމަށް ރައީސް ސޯލިހު ވިދާޅުވިކަމަށްވެސް އޭނާ ވިދާޅުވި އެވެ.
ރައީސް ހުވާކުރުމުގެ ރަސްމިއްޔާތުގައި އަލީއަށް ގޮނޑިއެއް ބޭންދީވެސް މާ ފަހުން ކަމަށާއި އެކަން ހިނގާ ދިޔަލެއް އަވަސްކަމުން އެ ރަސްމިއްޔާތަށް ވަޑައިގެންނެވީވެސް ބާ ކޯޓެއް ލައިގެންކަމަށް އަލީ ވިދާޅުވި އެވެ.
ޓޫރިޒަމް މިނިސްޓަރުގެ މަގާމާއި ހަވާލުވެވަޑައިގެންނެވީ ބޭނުންވެގެން ނޫންކަމަށާއި އެހެންނަމަވެސް މަގާމު ގަބޫލު ކުރެއްވީ ރައީސް އިތުބާރު ކުރައްވައި ދެއްވި މަގާމަކަށް ވުމުން އިހުލާސްތެރިވުމުގެ ގޮތުންކަމަށް އަލީ ވިދާޅުވި އެވެ. ކަންތައް ވެގެން ދިޔަ ގޮތުން މަގާމު ލިބުނީވެސް އަދި ދޫވީވެސް ވަރަށް ހައިރާންކަން ލިބެނިވި ގޮތަކަށް ކަމަށް އަލީ ވިދާޅުވި އެވެ.
