ނޫސްވެރިން ލިޔާ ލިޔުންތަކުގައި މައުލޫމާތު ފޯރުކޮށްދޭ މަސްދަރު ހާމަކުރަން މަޖުބޫރު ކުރަން، ސަރުކާރުން ހުށަހަޅާފައިވާ ހެއްކާއި ބެހޭ ބިލުގައި ހިމަނާފައި އޮތް މާއްދާ އުނިކުރަން މޯލްޑިވްސް މީޑިއާ ކައުންސިލް (އެމްއެމްސީ) އިން ގޮވާލައިފި އެވެ.
އެމްއެމްސީން މިއަދު ނެރުނު ބަޔާނެއްގައި ބުނީ ހެއްކާއި ބެހޭ ބިލުގައި މަސްދަރު ހާމަކުރަން ޖެހޭގޮތަށް އޮތް މާއްދާ ހިމަނައިގެން ބިލު ފާސްކޮށްފި ނަމަ، އެކަމުގެ ސަބަބުން ނޫސްވެރިކަމުގެ ހައްގުތަކަށް އުނިކަން އަންނާނެ ކަމަށެވެ. އަދި އެމާއްދާ އެގޮތަށް އޮއްވައި ގާނޫނު ފާސްކޮށްފިނަމަ އޭގެ ބޭނުން ނަހަމަ ގޮތުގައި ހިފައިފާނެ ކަމަށް ބަޔާނުގައި ވަނީ ބުނެފަ އެވެ.
ބިލާއިމެދު ކަންބޮޑުވުން ފާޅުކޮށް އެމްއެމްސީން އިތުރަށް ބުނީ ނޫސްވެރިކަަމުގެ ކުރިއެރުމަށް ހުރަސްއެޅިދާނެ އެއްވެސް ކަމެއް ކުރުމަކީ ޕްރެސް ފްރީޑަމް އިންޑެކްސްގައި ރާއްޖެ ހޯދަމުންދާ ކުރިއެރުންތައް ހުއްޓިދާނެ އަދި އެކަން މުޅި ދުނިޔޭގެ ސަމާލުކަމަށް އައިސް ބައިނަލްއަގުވާމީ އެތައް ގޮންޖެހުންތަކެއް ކުރިމަތިވެދާނެ ކަމެއް ކަމަށެވެ.
އަބުރު ރައްކާތެރިކުރުމާއި ހިޔާލުފާޅުކުރުމުގެ މިނިވަންކަމުގެ ގާނޫނު ވުޖޫދަށް އައުމުގެ ސަބަބުން ދިވެހިރާއްޖޭގެ މީޑިއާގެ ދާއިރާ އަށް ލިބިގެންދިޔަ ގެއްލުންތަކުން ފިލާވަޅު ލިބިގަނެ، ހެއްކާ ބެހޭ ބިލުން ވެސް މި ފާހަގަ ކުރެވުނު ބައިތައް އުނިކުރުމަށް މި ކައުންސިލުން ސަރުކާރާއި ރައްޔިތުންގެ މަޖިލީހަށް ގޮވާލަމެވެ.
- އެމްއެމްސީގެ ބަޔާން
ހެއްކާއިބެހޭ ބިލު މަޖިލީހަށް ހުށަހެޅީ ސަރުކާރުގެ ފަރާތުން ތިނަދޫ ދާއިރާގެ މެމްބަރު އަބްދުލް މުގުނީ އެވެ. އެ ބިލުގައި ވާގޮތުން މަސްދަރު ހާމަކުރަން މަޖުބޫރު ކުރަނީ އާންމު މަސްލަހަތު ހިފެހެއްޓުމުގެ ގޮތުން އެފަދަ ހާލަތްތަކުގަ އެވެ. އެފަދަ ހާލަތެއްގައި ނޫސްވެރިން ލިޔުން އާންމުކުރާ މީޑިއާތަކަށް މަސްދަރު ދޭން މަޖުބޫރު ކުރުމުގެ ބާރު ފަނޑިޔާރުންނަށް ވަނީ ލިބިދީފަ އެވެ.
މިމާއްދާ ހިމަނައި ބިލު ފާސްކޮށްފިނަމަ ކޮރަޕްޝަނާއި އެނޫންވެސް ބައެއް ކަންކަމުގައި މިހާރު މީޑިއާތަކަށް އެކި ފަރާތްތަކުން ދޭ މައުލޫމާތު އާންމުކުރަން ގިނަ ފަރާތްތަކަކުން ޖެހިލުން ވާނެ އެވެ. އެހެންކަމުން މިއީ މިނިވަން ނޫސްވެރިކަމަކަށް އެޅިގެން ހިނގައިދާނެ ހުރަހަކަށް ވުން ވަރަށް ގާތެވެ.
