އިދިކޮޅު ކޯލިޝަނުން "މިނިވަންކަމުގެ ދިފާއުގައި ދިވެހިން" ގެ ނަމުގައި ބޮޑު ޖަލްސާއެއް ބާއްވަން މާދަމާއަށް ތާވަލުކޮށްފި އެވެ.
މި ޖަލްސާ ބާއްވަނީ މާދަމާ ރޭ 8:15 ގައި ކާނިވާ ސަރަހައްދުގަ އެވެ.
އިދިކޮޅު ކޯލިޝަނުން ބުނީ މި ޖަލްސާއަކީ ދިވެހިރާއްޖޭގެ މިނިވަންކަމާއި އިސްތިގުލާލަށް ނުރައްކާވާ ކަންތައްތަކެއް ސަރުކާރުން ކުރަމުން ގެންދާތީ އެކަމާއި ދެކޮޅަށް ފަށާފައިވާ "މިނިވަންކަމުގެ ދިފާއުގައި ދިވެހިން"، މި ހަރަކާތް ރަސްމީކޮށް އިފްތިތާހު ކުރުމަށް ބާއްވާ ޖަލްސާއެއް ކަމަށެވެ. މި ޖަލްސާގައި އިދިކޮޅުން ބައެއް މުހިންމު ކަންކަން އިއުލާން ކުރަން ހަމަޖެހިފައިވާކަމަށް މައުލޫމާތު ލިބެ އެވެ.
އިންޑިއާ ސަރުކާރާއިއެކު ދިވެހި ސަރުކާރުން ހަދާފައިވާ ބައެއް އެއްބަސްވުމުގެ ސަބަބުން ގައުމީ ސަލާމަތާއި ރައްކާތެރިކަމަށް އަސަރު ކުރާނެ ކަމުގެ ތުހުމަތު އިދިކޮޅުން ކުރަމުން ގެންދާތާ ދުވަސްތަކެއް ވެއްޖެ އެވެ. ހާއްސަކޮށް އިންޑިއާ ސިފައިން ރާއްޖޭގައި ބޭތިއްބުމަށް ގިނަ އެއްބަސްވުންތަކެއް ހަދައި އެކަމުގެ ހުއްދަ ދިނުމަކީ މުޅި އިންޑިއާ ކަނޑުގެ ސަލާމަތަށް އޮތް ނުރައްކަލެއްކަމަށް އިދިކޮޅުން ދެކެ އެވެ.
އިއްޔެ އިދިކޮޅުން ވަނީ އިންޑިއާ ސަރުކާރާއިއެކު ހަދާފައިވާ އެއްބަސްވުންތަކުގެ އަސްލު 241 ކޮމިޓީއާއި ހިއްސާކުރަން ގޮވާލައި މަޖިލީހުގެ ރައީސަށް ސިޓީއެއްވެސް ފޮނުވައިފަ އެވެ.
