ސަރުކާރު ހިންގާ މައި ޕާޓީ، އެމްޑީޕީގެ އެތެރޭގެ އިންތިހާބުގެ ވޯޓުލުން ފަށައިފި އެވެ.
މިއީ މިހާތަނަށް ބާއްވާ އެމްޑީޕީގެ އެންމެ ބޮޑު އެތެރޭގެ އިންތިހާބެވެ. ވޯޓުލުން ފެށީ މިއަދު ހެނދުނު 9:00 ގަ އެވެ. ވޯޓުލުން ހަވީރު 5:00 އަށް ކުރި އަށް ދާނެ އެވެ.
މިއަދުގެ އިންތިހާބު އެންމެ ހާއްސަވެފައި ވާދަވެރިވާ އެއް ސަބަބަކީ ޕާޓީގެ ތެރޭގައި އުފެދިފައިވާ ދެ ފެކްޝަނެވެ. ޕާޓީގެ އިސް ލީޑަރު އަދި ރައީސް އިބްރާޙިމް މުހައްމަދު ސޯލިހު އެއް ފެކްޝަން ލީޑު ކުރައްވާއިރު އަނެއް ފެކްޝަންގައި އިސްކޮށް ހުންނެވީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ.
މިފަހަކަށް އައިސް އެމްޑީޕީގެ ގައުމީ މަޖިލީހުގައި އަގުލަބިއްޔަތު ހޯއްދަވަނީ ރައީސް ސޯލިހެވެ. އެހެންނަމަވެސް އާންމު މެމްބަރުންގެ މެދުގައި އެމަނިކުފާނުގެ ތާއީދު އިތުރުވެދާނެކަމަކަށް ނުބެލެވެ އެވެ. ރައީސް ސޯލިހާއި ރައީސް ނަޝީދުވެސް ވަނީ އިންތިހާބަށް ކެނޑިޑޭޓުން ނެރުއްވައިފަ އެވެ. އެހެންކަމުން މިއީ މި ދެބޭފުޅުންގެ ހިމޭން ހަނގުރާމައެއްގެ ގޮތުގައި އޮތީ ބެލެވިފަ އެވެ.
އިންތިހާބަށް ބަލާލާއިރު ޖުމްލަ 455 މެމްބަރަކު އެކި ދާއިރާތަކަށް އިންތިހާބު ކުރާނެ އެވެ. ވޯޓު ލުމުގެ ކުރިން އޭގެ ތެރެއިން 165 ކެނޑިޑޭޓަކަށް ވަނީ އިންތިހާބާއި ނުލައި ގޮނޑި ކަށަވަރުވެފަ އެވެ. އެއީ އެ ދާއިރާތަކަށް އިތުރު ކެނޑިޑޭޓުން ވާދަ ނުކުރައްވާތީ އެވެ.
ކޮވިޑުގެ ހާލަތުގެ ސަބަބުން މިއަދު ވޯޓުލުން ކުރިއަށް ނުގެންދާނީ ތ. ގުރައިދޫގައި އެކަންޏެވެ. އެރަށުގައި ވޯޓުލާނީ ހާލަތު ރަނގަޅުވުމުންކަމަށް އެމްޑީޕީން ބުނެ އެވެ.
