މޫސުން ގޯސްވެ ރާއްޖޭގެ ބޮޑު ސަރަހައްދަކަށް ޔެލޯ އެލާޓް ނެރެފި

ރާއްޖޭގެ ބޮޑު ސަރަހައްދަކަށް ވިއްސާރަކޮށް ވައި ގަދަވާނެ ކަމަށް ލަފާކޮށް މޫސުމާ ބެހޭ ގައުމީ އިދާރާ (މެޓް އޮފީސް) އިން ޔެލޯ އެލާޓު ނެރެފި އެވެ.

އެގޮތުން މިއަދު ހެނދުނު 11:30 އާއި ހަމައަށް ޔެލޯ އެލާޓް ނެރެފައިވަނީ ހއ. އަތޮޅުން ފެށިގެން ލ. އަތޮޅާއި ހަމައަށެވެ.

މި ސަރަހައްދުތަކަށް ބޯކޮށް ވާރޭވެހި ގަޑިއަކު 25 މޭލާއި 30 މޭލާއި ދެމެދުގައި ވައިޖެހޭނެ ކަމަށް ވަނީ ލަފާކޮށްފަ އެވެ. އަދި ކޮޅިގަނޑުގައި 50 މޭލަށް ވައި ގަދަވެދާނެ ކަމަށްވެސް ވަނީ ލަފާކޮށްފަ އެވެ.

ޔެލޯ އެލާޓް ނެރެފައިވާ ސަރަހައްދުތަކަށް ކަނޑު ގަދަވުމާއިއެކު އުދައެރުންވެސް އެކަށީގެންވާކަމަށް މެޓް އޮފީހުން ވަނީ ބުނެފަ އެވެ.

ރާއްޖޭގައި މިހާރު ކުރަމުންދާ ވިއްސާރަ ކުރިއަށް އޮތް ހަފްތާއެއްހާ ދުވަހަށް ދިގު ދެމިގެންދާނެ ކަމަށް ބެލެވެ އެވެ.