"ހޭންޑީ ކްރޫޒާ" ނަމަކަށް ކިޔާ ސަފާރީއެއް އަޑިއަށް ދިޔައިރު އެސަފާރީގައި ހުރި މީހަކު ސަލާމަތްކޮށް ހޮސްޕިޓަލުގައި ފަރުވާ ދެމުން ދަނިކޮށް މަރުވެއްޖެ އެވެ.
މިއަދު އަޑިއަށްދިޔަ ސަފާރީން ސަލާމަތްކުރި ހަ މީހަކަށް ދަނީ ހޮސްޕިޓަލުގައި ފަރުވާ ދެމުންނެވެ. އޭގެ ތެރެއިން މަރުވީ 41 އަހަރުގެ ބިދޭސީ ފިރިހެނެކެވެ. ދެން ތިބި ފަސް މީހުންގެ ހާލަތުވެސް ވަރަށް ސީރިއަސް ކަމަށް މައުލޫމާތު ލިބެ އެވެ.
އެމްއެންޑީއެފްއިން މި ކަމާއި ގުޅޭ މާގިނަ ތަފްސީލެއް ހިއްސާކޮށްފައެއް ނުވެ އެވެ.
މާލެ އަތޮޅުގައި އޮތް ސަފާރީއެއް އަޑިއަށް ދާކަމުގެ މައުލޫމާތު އެމްއެންޑީއެފްއަށް ލިބުނީ މިއަދު ހެނދުނު 8:39 ގައި ކަމަށް އެ އިދާރާއިން ބުންޏެވެ. އެ ސަފާރީގައި ޓޫރިސްޓުންނާއިއެކު 17 މީހުން ތިއްބެވެ. އެ ސަފާރީ ދަތުރު ކުރަމުން ދިޔައީ މާލެ އަށެވެ.
ވިއްސާރަވެ މޫސުން ގޯސްވުމުގެ ސަބަބުން ރާއްޖޭގެ ބޮޑު ސަރަހައްދަކަށް އޮތީ ޔެލޯ އެލާޓް ނެރެފަ އެވެ. މި ވިއްސާރައިގައި ވައި ގަދަވެ ކަނޑުތައްވެސް ގަދަވާނެ ކަމަށް މޫސުމާއިބެހޭ އިދާރާއިން އޮތީ ބުނެފަ އެވެ.
