އެކަކު އަނެކަކަށް ވަގަށް ގޮވައި ހެދުމުން ބައިބައިވެ އަސަރު ކުރާނީ ގައުމާއި ރައްޔިތުންނަށްކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެ އެވެ.
ނިހާދު މިފަދައިން ވިދާޅުވެފައިމިވަނީ އެމްޑީޕީގެ އެތެރޭގައި މިހާރު އުފެދިފައިވާ ބައިބައިވުންތަކަށް އިޝާރާތްކޮށްކަމަށް ބެލެވެ އެވެ.
ނިހާދު ވިދާޅުވީ އެކުވެރިކަމާއިއެކު އެއް ޓީމެއްގެ ގޮތުގައި ގައުމާއި ރައްޔިތުންގެ މަސްލަހަތު އިސްކޮށް މަސައްކަތް ކުރަން ޖެހޭކަމަށް ދެކިލައްވާ ކަމަށެވެ.
"އޭރަށް ޓީމުވެސް އެކުވެ ގައުމަށް ހެޔޮ ބަދަލު ގެނެވޭނެކަން ޔަގީން"
- މުހައްމަދު ނިހާދު
ނިހާދު މިފަދަ މޭރުމަކުން ވާހަކަ ދެއްކެވިއިރު މިދިޔަ ހޮނިހިރު ދުވަހު ނިމިގެންދިޔަ އެމްޑީޕީގެ އެތެރޭގެ އިންތިހާބާއި ދިމާކޮށް އެޕާޓީ ވަނީ ވަރަށް ބޮޑަށް ބައިބައިވެފަ އެވެ. އެގޮތުން ބައެއް މިނިސްޓަރުންގެ ބޮލުގައި ކޮރަޕްޝަންގެ ތުހުމަތު އަޅުވައި، ކުންފުނިތަކުގެ ވެރިން ފައިސާއާއި ވަޒީފާގެ ނުފޫޒު ބޭނުންކުރިކަމަށްވެސް އެމްޑީޕީގެ ތެރެއިން ތުހުމަތު ކުރެވުނެވެ.
އެމްޑީޕީގެ ރައީސް މުހައްމަދު ނަޝީދާއި އެޕާޓީގެ އިސް ލީޑަރު ރައީސް އިބްރާޙިމް މުހައްމަދު ސޯލިހާއި ދެމެދު އުފެދިފައިވާ ސިޔާސީ ހިޔާލުތަފާތުވުންތަކެއްގެ ސަބަބުން އެ ދެބޭފުޅުންގެ ގުޅުން ވަނީ ވަރަށް ބޮޑަށް ހީނަރުވެފަ އެވެ. މިދިޔަ މެއި މަހުގެ ތެރޭގައި ރައީސް ނަޝީދަށް ދިން ބޮމުގެ ހަމަލާއަށް ފަހު ފަރުވާއަށް ރާއްޖެއިން ބޭރަށް ވަޑައިގެން ފަސް މަސް ދުވަސް ވާން ކައިރިވެފައިވާއިރު ތަހުގީގު ނުނިމެނީސް މާލެ ވަޑައިގަންނަވަން ޖެހިލުންވެވަޑައިގަންނަވާކަމަށް ނަޝީދު ވިދާޅުވެ އެވެ.
