ސޯޝަލް މީޑިއާ ޕްލެޓްފޯމު، ޓެލެގްރާމްގައި ބަރަހަނާ ފޮޓޯތަކެއް ލީކުކުރި މީހާގެ ބަންދަށް އިތުރު 15 ދުވަސް ޖަހަން ކްރިމިނަލް ކޯޓުން އަމުރުކޮށްފި އެވެ.
މިމައްސައިގައި ދައުވާ އުފުލާފައިވަނީ އުމުރުން 36 އަހަރުގެ މުހައްމަދު މަސާއިދު ބިން ސަމީއުގެ މައްޗަށެވެ. އޭނާ ވަނީ ގިނަ ބައެއްގެ މިލިއަނަކަށްވުރެއް ގިނަ ބަރަހަނާ ފޮޓޯތައް ސޯޝަލް މީޑިއާގައި ލީކުކޮށްލައިފަ އެވެ. އަދި ފޮޓޯތަކާއިއެކު ޒާތީ މައުލޫމާތުވެސް އާންމުކުރި އެވެ.
މަސާއިދުގެ މައްޗަށް ދައުލަތުން ވަނީ 11 ދައުވާއެއް އުފުލައިފަ އެވެ. އެއީ އޮރިޔާން ކާޑު ގެންގުޅުމުގެ ކުށުގެ 3 ދަޢުވާއާއި، އޮރިޔާން ކާޑު ފެތުރުމުގެ ކުށުގެ 3 ދަޢުވާއާއި، އެނގިހުރެ ހުއްދަނޫން ގޮތުގައި މަޢުލޫމާތު ހޯދުމުގެ ކުށުގެ ދަޢުވާއާއި، އެނގިހުރެ ހުއްދަނޫން ގޮތުގައި މަޢުލޫމާތު ހޯދަން އުޅުމުގެ ކުށުގެ ދަޢުވާއާއި، ޢަދުލު އިންސާފު ޤާއިމުކުރަން ހުރަސްއެޅުމުގެ ކުށުގެ ދަޢުވާއާއި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތުގައި ބާރު ހިންގުމުގެ ކުށުގެ ދަޢުވާއާއި، އެނގިހުރެ ހުއްދަނޫން ތަނަކަށް ވަނުމުގެ ކުށުގެ ދަޢުވާ އެވެ.
މިމައްސަލައިގައި ފުލުހުން ވަނީ މަސާއިދު ބޭނުންކުރާކަމަށް ބެލެވޭ އައިޕީ އެޑްރެހެއް މެދުވެރިކޮށް ވިކްޓިމްގެ ފޮޓޯތަކެއް ސޯޝަލްމީޑިއާއަށް ލީކުކޮށްލިކަން އެނގޭ ސްނެޕްޝޮޓުތަކެއް ހެކީގެ ގޮތުގައި ހުށަހަޅައިފަ އެވެ. އޭނާގެ ގެއިންނާއި އޮފީހުންވެސް ވަނީ ގިނަ އަދަދެއްގެ އިލެކްޓްރޯނިކް ސާމާނު ފުލުހުންގެ ބެލުމުގެ ދަށަށް ގެންގޮސްފަ އެވެ. އެތަކެތިން މިލިއަނަށްވުރެއް ގިނަ ބަރަހަނާ ފޮޓޯއާއި ވީޑިއޯވެސް ވަނީ ފެނިފަ އެވެ.
މިމައްސަލައިގައި މަސާއިދުގެ ބަންދުގެ މުއްދަތު އިތުރުކުރަން އިއްޔެ ކްރިމިނަލް ކޯޓަށް ގެންދިޔުމުން ވަނީ އޭނާގެ ބަންދަށް އިތުރު 15 ދުވަސް އިތުރުކޮށްފަ އެވެ.
