ކޮވިޑް-19 އާއި ގުޅިގެން ވަޒީފާ ގެއްލި އާމްދަނީއަށް އަސަރުކުރި ފަރާތްތަކަށް ދައުލަތުން ދޫކުރި އިންކަމް ސަޕޯޓު އޮޅުވާލައިގެން ގިނަ ބަޔަކު ހޯދިއިރު، އެއަދަދު ފަސް މިލިއަނާ ގާތަށް އަރާކަމަށް އޮޑިޓް ރިޕޯޓުން ދައްކައިފި އެވެ.
އޮޑިޓާ ޖެނެރަލް އޮފީހުން ވަނީ "ކޮވިޑް-19 އެމަޖެންސީ އިންކަމް ސަޕޯޓު އެލެވެންސް ޕްރޮޖެކްޓް" ގެ ނަމުގައި ރިޕޯޓެއް އާންމުކޮށްފަ އެވެ. އެރިޕޯޓުގައި ބުނީ އޮޑިޓުން ދައްކާ ގޮތުގައި ދޮގު މައުލޫމާތު ހުށަހަޅައި އޮޅުވާލައިގެން ހޯދި ފައިސާގެ އަދަދު 4،974،477 ރުފިޔާއަށް އަރާކަމަށެވެ.
އެންސްޕާ މެދުވެރިކޮށް އިކޮނޮމިކް މިނިސްޓްރީން ހިންގި އެ ޕްރޮގުރާމުގައި އޮޅުވާލައިގެން ފައިސާ ހޯދި ފަރާތްތަކުގެ އަތުން އެފައިސާ އަނބުރާ ހޯދުމުގެ މަސައްކަތް ސަރުކާރުން ފެށި އެވެ. އެހެންނަމަވެސް މިހާތަނަށް ހޯދުނީ އެންމެ 213،884 ރުފިޔާ އެވެ.
ކޮވިޑުގެ ސަބަބުން އާމްދަނީއަށް އަސަރުކުރި މީހުންނަށް ސަރުކާރުން ވަނީ 421 މިލިއަން ރުފިޔާގެ އެލެވެންސް ދޫކޮށްފަ އެވެ.
އިކޮނޮމިކް މިނިސްޓްރީން ވަނީ އޮޅުވާލައިގެން ފައިސާ ހޯދި މީހުންނަށް އެފައިސާ އަނބުރާ ދޭން އަންގައިފަ އެވެ. އަދި ފައިސާ އަނބުރާ ނުދޭނަމަ ދައުވާ ކުރާނެކަމަށްވެސް މިނިސްޓްރީން ވަނީ ބުނެފަ އެވެ.
