ޓިކްޓޮކްގައި ބަރަހަނާ ވީޑިއޯއެއް އާންމުކުރި މުހައްމަދު ނަބީލް (ޔާޔާ) ގެ ބަންދަށް 12 ދުވަސް ކްރިމިނަލް ކޯޓުން އިތުރުކޮށްފި އެވެ.
އުމުރުން 36 އަހަރުގެ ޔާޔާ އަކީ ޓިކްޓޮކްގައި ގިނަ ބައެއްގެ ސަމާލުކަން ހޯދި މީހެކެވެ. އޭނާއަށް ގިނަ ފާޑުކިޔުންތަކެއް އަމާޒުވާން ފެށީ އަންހެން ހެދުން އަޅައިގެން ވީޑިއޯތަކެއް އާންމު ކުރަން ފެށުމުންނެވެ.
އޭގެ ފަހުން މިމަހުގެ 10 ވަނަ ދުވަހު ޔާޔާގެ ޓިކްޓޮކް އެކައުންޓުން ވަނީ އޭނާ ބަރަހަނާވެ ނަށާ ވީޑިއޯއެއް އާންމުކޮށްފަ އެވެ. މިމައްސަލައިގައި ގިނަ ބައެއްގެ ފާޑުކިޔުން އަމާޒުވެފައިވަނިކޮށް ފުލުހުން އޭނާ ހައްޔަރުކުރީ މިމަހުގެ 11 ވަނަ ދުވަހުގެ ރެ އެވެ.
ކްރިމިނަލް ކޯޓުން އިއްޔެ ޔާޔާގެ ބަންދަށް 12 ދުވަސް ޖެހީ މުޖުތަމައުގެ ސަލާމަތަށް ނުރައްކާ ވެދާނެތީއާއި ހެކި ނައްތާލައިފާނެކަމަށް ބެލެވޭތީ އެވެ.
މިމައްސަލައިގައި ކޯޓަށް ހާޒިރު ކުރުމުން ޔާޔާ ބުނީ ބަރަހަނާ ވީޑިއޯއެއް އާންމު ނުކުރާ ކަމަށެވެ. އަދި އެއީ އޭނާގެ މޫނު ބޭނުންކޮށްގެން އެޑިޓްކޮށްފައިވާ ވީޑިއޯއެއްކަމަށްވެސް ޔާޔާ ވަނީ ބުނެފަ އެވެ.
އެހެންނަމަވެސް ފުލުހުން ބުނީ ވީޑިއޯގައި ޔާޔާ ލައިގެން ހުރި ހެދުން އޭނާ ދިރިއުޅޭ ކޮޓަރިން ފެނުނުކަމަށް ކޯޓުގައި ބުނެފަ އެވެ.
އަންހެން ހެދުން ލައިގެން ގިނަ ވީޑިއޯތަކެއް ކުޅުމަށްފަހު ޔާޔާ ވަނީ ބައްޕަގެ އެދުމުން ކަމަށް ބުނެ ހުރިހާ ވީޑިއޯއެއް ޑިލީޓްކޮށް ޓިކްޓޮކް އެކައުންޓުވެސް ޑިލީޓު ކޮށްފަ އެވެ. ފަހުން ހެދި އެކައުންޓުން އަޕްލޯޑްކޮށްފައިވަނީ ހަމައެކަނި ބަރަހަނާ ވީޑިއޯ އެކަންޏެވެ.
