ރައްޔިތުންގެ މަޖިލީހުގެ ހުސްވެފައިވާ ކޮމަންޑޫ ދާއިރާގެ ގޮނޑިއަށް ބޭފުޅަކު އިންތިހާބު ކުރެއްވުމަށް ބާއްވާ ބައި-އިލެކްޝަންގައި މޯލްޑިވްސް ނެޝަނަލް ޕާޓީ (އެމްއެންޕީ) އިން ޓިކެޓް ދީފައިވާ އަބްދުލް ހަންނާން އިދުރީސް، އިންތިހާބުގައި ވާދަކުރުމަށް އިލެކްޝަންސް ކޮމިޝަނަށް ފޯމް ހުށަހަޅުއްވައިފި އެވެ.
ހަންނާނު އީސީއަށް ވަޑައިގެން ފޯމު ހުށަހެޅުއްވީ ހޯމަދުވަހުގެ ވަގުތެއްގައިކަން އެމްއެންޕީން ވަނީ ކަށަވަރުކޮށްދީފަ އެވެ. އޭނާގެ ފޯމާ ހަވާލުވެލެއްވީ އިލެކްޝަންސް ކޮމިޝަންގެ ސެކްރެޓަރީ ޖެނެރަލް ހަސަން ސުލައިމާން އެވެ. ރައްޔިތުންގެ މަޖިލީހުގެ ހުސްވެފައިވާ ކޮމަންޑޫ ދާއިރާގެ ބައި-އިލެކްޝަންގައި ވާދަކުރުމަށް އެމްއެންޕީން ހަންނާނަށް ރަސްމީކޮށް ޓިކެޓް ހަވާލުކުރީ މިދިޔަ ހޮނިހިރު ދުވަހުގެ ރޭ ބޭއްވި ހާއްސަ ރަސްމިއްޔާތެއްގަ އެވެ.
އެމްއެންޕީގެ ފަރާތުން އެ ދާއިރާއަށް ކުރިމަތިލާން ހުޅުވައިލި ފުރުސަތުގައި، އެކަމަށް އެ ޕާޓީގެ ފަރާތުން ކުރިމަތިލެއްވީ ވެސް ހަންނާނު އެކަންޏެވެ ހަންނާނަކީ ތިރީސް އަހަރަށްވުރެއް ގިނަ ދުވަހު ތައުލީމީ ދާއިރާއަށް ހިދުމަތް ކޮށްދެއްވާފައިވާ ބޭފުޅެކެވެ. މިހާރު އޭނާ އުޅުއްވަނީ އަމިއްލަ ވިޔަފާރި ކުރެއްވުމުގައެވެ.
އެމްއެންޕީގެ އިސް ބޭފުޅުން މިއަދު ވަނީ ހަންނާނާއިއެކު ކޮމަންޑޫ ދާއިރާގެ ރަށްތަކަށް ކެމްޕެއިން ދަތުރުތައް ފައްޓަވާފަ އެވެ. އެގޮތުން އެންމެ ފުރަތަމަ ކެމްޕެއިން ޓީމުން ވަޑައިގެންނެވީ ކޮމަންޑޫއަށެވެ.
ހަންނާނުގެ ކެމްޕެއިނަށް އެމްއެންޕީގެ އިސް ބޭފުޅުން ކުރައްވަމުން ގެންދަވާ ދަތުރުފުޅުގެ ތެރެއިން
އެމްއެންޕީން ކޮމަންޑޫ ދާއިރާއަށް ވާދަކުރަން ކެމްޕެއިން ކުރަމުން ދާއިރު ސަރުކާރު ހިންގާ މައި ޕާޓީ އެމްޑީޕީންވެސް އެގޮނޑިއަށް ވާދަކުރާނެކަން ވަނީ އިއުލާންކޮށްފަ އެވެ. ކޮމަންޑޫ ދާއިރާގެ ގޮނޑީގައި ކުރިން އިންނެވި މަރުހޫމް ހުސައިން ވަހީދަކީ އެޕާޓީ ތަމްސީލު ކުރެއްވި ބޭފުޅެކެވެ. އެމްޑީޕީއާއި އެމްއެންޕީގެ އިތުރުން އެމްޓީޑީއާއި އިދިކޮޅު ކޯލިޝަން ޕީޕީއެމް، ޕީއެންސީންވެސް ކެނޑިޑޭޓަކު ނެރޭނެކަން ވަނީ އިއުލާން ކޮށްފަ އެވެ.
ކޮމަންޑޫ ދާއިރާގެ ބައި އިލެކްޝަން ބޭއްވުމަށް ހަމަޖެހިފައި ވަނީ އަންނަ އަހަރުގެ ފެބްރުއަރީ މަހުގެ ފަސް ވަނަ ދުވަހު އެވެ.
