ރަނގަޅު ކާނާ ނުލިބުމުގެ ސަބަބުން ނުވަތަ ނުކެއުމުގެ ސަބަބުން ދިމާވާ ސިއްހީ މައްސަލަތައް ގުޅިފައިވަނީ ފުރާވަރަށް އަރާ އަންހެން ކުދިންގެ ނިއުޓްރިޝަންއާކަމަށް ތަޖުރިބާކާރުން ވިދާޅުވާ ކަމަށާއި އެހެންކަމުން އެކުދިން ރަނގަޅު ކާނާ ކެއުން މުހިންމުކަމަށް ރައީސް އިބްރާހިމް މުހައްމަދު ޞާލިހުގެ އަނބިކަނބަލުން ފަޒްނާ އަހުމަދު ވިދާޅުވެއްޖެ އެވެ.
ފަސްޓްލޭޑީ ފަޒްނާ މިފަދައިން ވިދާޅުވީ 09 ވަނަ ނޭޝަނަލް ސިކްސަރސް ކޭމްޕް 2021 ގެ ތެރޭގައި ކުރިއަށް ގެންދާ ލިޓްލްމެއިޑްސްގެ އެޑްވޮކަސީ ޙަރަކާތުގައި ބައިވެރިވެވަޑައިގެން ވާހަކަފުޅު ދައްކަވަމުންނެވެ. އެގޮތުން ފަޒްނާ ވަނީ ދުޅަހެޔޮ ޞިއްޙަތެއްގައި ހުރުމަށް ނިއުޓްރިޝަން ލިބޭ ފަދަ އެކި ބާވަތްތަކުގެ ދުޅަހެޔޮ ކާނާ ކެޔުމުގެ މުހިންމުކަން ފާހަގަކުރައްވާ އެކަމާ ގުޅޭގޮތުން ފުޅާ ދާއިރާއެއްގައި ވާހަކަފުޅުދައްކަވައިފަ އެވެ. ފުރާވަރަށް އަރާ އަންހެން ކުދިން ރަނގަޅު ކާނާ ކެއުން މުހިންމުކަމަށާއި އާންމުކޮށް ރާއްޖެއިން ލިބެން ހުންނަ ތަކެތި ބޭނުންކޮށްގެންވެސް ސިއްހަތަށް ފައިދާހުރި ކާނާ ކެވޭނެކަމަށް އެކަމަނާ ވިދާޅުވި އެވެ.
"ވަރަށް ގިނަ ފަހަރަށް ބެލެންސް ޑައިޓެއްގެ ވާހަކަ ނޫނީ ނިއުޓްރިޝަންގެ ވާހަކަ ނޫނިއްޔާ ކަސްރަތު ކުރާވާހަކަ ހަމަ ދައްކާލާއިރަށް އެންމެންނަށްވެސް ވާގޮތެއް، މިހާރު ވެއްޖެއްޔާ އިންޓަނެޓަށް ގޮސް ގޫގުލް ކޮށްލާނީ. އޭގަ ދެން ގިނައިން ހުންނާނީ ރާއްޖެއިން ބޭރުން ލިބޭ ކާއެއްޗެހި. ރާއްޖެއިންވެސް ލިބޭނެ. އެކަމަކު ތަންކޮޅެއް އަގުބޮޑު ކާއެއްޗެހި... އެހެންނަމަވެސް އަޅުގަނޑު ތިކުދިން ކައިރީގަ ބުނެލަން ބޭނުންވަނީ، އަސްލު ރާއްޖެއިންވެސް ހަމަ ލިބޭނެ ވަރަށް ރަނގަޅު އެއްޗެހި، ރަނގަޅު ކާނާ" ފަޒްނާ ވިދާޅުވި އެވެ.
09 ވަނަ ނޭޝަނަލް ސިކްސަރސް ކޭމްޕް 2021 ގެ ތެރެއިން
ފަޒްނާ ވިދާޅުވީ ކަސްރަތު ކުރުމުގެ ވާހަކަ ދެކެވޭއިރު ވަރަށް ގިނަ މީހުންނަށް އެކި ބަހަނާ ދެއްކޭކަމަށެވެ. އެއީ ކޮންމެ ދުވަހަކު ޓްރެކަށް ގޮސް ދުވެގެން އެކަނި ކުރެވޭނެ ކަމެއް ނޫންކަމަށާއި އަދި ކޮންމެހެން ގޭގައި ޓްރެޑްމިލްއެއް ނެތަސް ކަސްރަތު ކުރެވިދާނެކަމަށް ވިދާޅުވި އެވެ. އެގޮތުން ހުރިތާ ހުރެގެން ސްކިޕިން ރޯޕެއް ބޭނުންކޮށްގެން ނޫނީ ހުރިތަނެއްގައި ހިނގައިލުމުންވެސް ކަސްރަތުން ލިބޭ ފައިދާ ލިބޭނެކަމަށް ފަޒްނާގެ ވާހަކަފުޅުގައި ވިދާޅުވި އެވެ.
ކިތަންމެ ބިޒީކޮށް އުޅުނަސް ކަސްރަތު ކުރުމަކީ މުހިންމު ކަމެއްކަމަށް އެކަމަނާ ވިދާޅުވިއެވެ. އެހެންކަމުން އެއްވެސް ވަރަކަށް ބަހަނާ ދައްކައިގެން ކަސްރަތު ކުރުން ދޫކޮށްލުން ރަނގަޅު ނޫންކަމަށް ފަޒްނާ ފާހަގަކުރެއްވި އެވެ.
ގާރލް ޕަވަރޑް ނިއުޓްރިޝަންގެ މުގައްރަރަކީ ވޯރލްޑް އެސޯސިއޭޝަން ފޮރ ގާރލް ގައިޑްސް އެންޑް ގާރލް ސްކައުޓްސް (ވެގްސް) އަދި ނިއުޓްރިޝަން އިންޓަރނޭޝަނަލް ގުޅިގެން ތައްޔާރުކޮށްފައިވާ މުގައްރަރެކެވެ. މިޙަރަކާތުގެ ތެރެއިން ކެއުމުގައި ރަނގަޅު ކާނާ ހިމެނުމާއި ޙަރަކާތްތެރިވެ އުޅުމުގެ މުހިންމުކަން ދަސްކޮށްދިނުމަށް ކުދިންގެ ޢުމުރާ ގުޅޭގޮތުން ގިނަ ޙަރަކާތްތަކެއް ވަނީ ރޭވިފަ އެވެ. މީގެ އިތުރުން "ސިކްސަރސް ޗެލެންޖް" ވެސް ބައިވެރިން ވަނީ ފުރިހަމަކޮށްފަ އެވެ. އެއީ ތަފާތު އެކި ހުނަރުތައް އަދި ދިރިއުޅުމުގެ ޢަމަލީ މައިދާނުގައި އިސްނަގައިގެން މީހުންނާއި ގުޅިގެން މަސައްކަތްކުރުމުގެ އާދަ އަށަގެންނެވުމަށް މަގުފަހިކޮށްދޭނެ ގޮތައް ފަރުމާ ކުރެވިފައިވާ ޙަރަކާތްތަކެކެވެ.
ޑިސެމްބަރ މަހުގެ 26 - 28 އަށް ހުޅުމާލޭ ޣާޒީ ސްކޫލުގައި ކުރިޔަށް ގެންދާ މި ކޭމްޕަކީ ރާއްޖޭގެ ލިޓްލްމެއިޑް ޙަރަކާތް ހިންގާ ހުރިހާ ސްކޫލްތަކުގެ ޢުމުރުން 10 – 11 އަހަރާއި ދެމެދުގެ 308 ލިޓްލްމެއިޑުން އަދި 75 ގައިޑަރސް އޮފިޝަލުންގެ ގޮތުގައި ބައިވެރިވާ ކޭމްޕެކެވެ. ރާއްޖޭގެ 13 އަތޮޅަކުން 42 ސްކޫލުން ބައިވެރިވެފައިވާ މި ކޭމްޕުގެ މި އަހަރުގެ ޝިއާރަކީ "ގާރލް ޕަވަރޑް ނިއުޓްރިޝަން" އެވެ.
