ކޮވިޑް-19 ގެ ސަބަބުން އަޅާ ރައްކާތެރިކަމުގެ ފިޔަވަޅެއްގެ ގޮތުން ގިނަ މީހުން އެއްވާ ހަފްލާތަކާއި ހަރަކާތްތައް ނުބާއްވަން ހެލްތު ޕްރޮޓެކްޝަން އޭޖެންސީ، އެޗްޕީއޭއިން އިލްތިމާސްކޮށްފައިވަނިކޮށް އާ އަހަރުގެ މިޔުޒިކް ޝޯ ހުޅުމާލޭގައި ބާއްވަން އިއުލާންކޮށްފި އެވެ.
ހުޅުމާލެ ދުވާ ޓްރެކު ސަރަހައްދުގައި ސްޓޭޖް ޝޯވ ބާއްވާނެކަން އިއުލާން ކުރެއްވީ ޔޫތު މިނިސްޓަރު އަހުމަދު މަހުލޫފެވެ. މަހުލޫވު ވިދާޅުވީ 2022 ވަނަ އަހަރަށް މަރުހަބާ ކިޔުމުގެ ގޮތުން ޑިސެމްބަރު 31 ވާ ހުކުރު ދުވަހުގެ ރޭ ޔޫތު މިނިސްތްރީން އިންތިޒާމުކޮށްގެން ސްޓޭޖު ޝޯއެއް ބޭއްވުމަށް ތައްޔާރުވަމުންދާކަމަށެވެ.
މިޝޯ ބާއްވަން އިއުލާންކުރިއިރު މިހާރު މިހިނގާ ސްކޫލު ބަންދާއި ދިމާކޮށް މީހުން އެއްވެ އުޅޭފަދަ ހަރަކާތްތައް ނުބާއްވަން އެޗްޕީއޭއިން ވަނީ އިލްތިމާސްކޮށްފަ އެވެ. އެ އޭޖެންސީން ބުނީ ރާއްޖެއިން ކޮވިޑުގެ އާ ވޭރިއެންޓު، އޮމިކްރޯން ފެނުމާއި ގުޅިގެން ހަލުވި ކަމާއިއެކު ބަލި ފެތުރިގެން ހިނގައިދާނެކަމުގެ ބިރު އެބައޮތްކަމަށެވެ.
އާ އަހަރާއި ދިމާކޮށް މީގެ ކުރިން މާލޭގައި ބާއްވަމުން އަންނަ ޝޯތަކުގައި މާލެ ސަރަހައްދުގައި ދިރިއުޅޭ އެތައް ހާސް ބަޔަކު އެއްތަނަކަށް އެއްވެ އެވެ. މިފަދަ ޝޯތަކުގައި ގިނަ މީހުން ތިބޭނީ ޖެހިޖެހިގެންނެވެ.
މަހުލޫފު ވިދާޅުވީ އާ އަހަރުގެ ޝޯގައި ހުށަހެޅުންތައް ހުށަހަޅައިދޭން ބޮލީވުޑްގެ މަޝްހޫރު ލަވަކިޔުންތެރިޔާ އަންކިތު ތިވާރީ ރާއްޖެ އަންނަން ހަމަޖެހިފައިވާކަމަށެވެ. މީގެ އިތުރުން ރާއްޖޭގެ ގިނަ ފަންނާނުންތަކެއްވެސް މިޝޯގައި ޕާފޯމް ކުރާނެކަމަށް މަހުލޫފު ވިދާޅުވި އެވެ.
އާ އަހަރުގެ ޝޯ ސްޕޮންސާ ކޮށްފައިވަނީ ފެނަކަ، އެމްޓީސީސީ، އެމްޕީއެލް، އުރީދޫ، ދިރާގު، އެމްޑަބްލިއުއެސްސީ، ސްޓެލްކޯ، އެސްޓީއޯ، ދަމާސް، މޯލްޑިވިއަންގެ އިތުރުން ޓޫރިޒަމް މިނިސްޓްރީންނެވެ.
