ސަރުކާރުން އަލަށް އިއުލާންކުރި މިނިމަމް ވޭޖު ނުވަތަ އެންމެ ކުޑަ އުޖޫރަ ދިނުމުގެ ސިޔާސަތުގެ ދަށުން ފާސްކުރި ގަރާރަށް އަމަލުކުރަން ފެށުމުގެ ގޮތުން ސިވިލް ސާވިސް މުވައްޒަފުންނަށް ފިކްސްޑް އެލެވެންސެއް ދޭން ނިންމައިފި އެވެ.
ޕޭކޮމިޝަނާއި ސިވިލް ސާވިސް ކޮމިޝަން ގުޅިގެން ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވަނީ ސިވިލް ސާވިސް މުވައްޒަފުންގެ މުސާރައަށް އަންނާނެ ބަދަލުތައް އިއުލާންކޮށްފަ އެވެ. އެގޮތުން ޕޭކޮމިޝަންގެ ސެކެޓްރީ ޖެނެރަލް ޑރ. މުހައްމަދު ފައިޒަލް ވިދާޅުވީ މިނިމަމް ވޭޖާ އެކު ސިވިލް ސާވިސްގެ 11،828 މުވައްޒަފުންގެ މުސާރައަށް ބަދަލު އަންނާނެ ކަމަށެވެ.
މީގެ ތެރެއިން 50 ޕަސެންޓް މުވައްޒަފުންނަށް 1،500ރ. ގެ އިތުރުވުމެއް ލިބޭނެ އެވެ. އަދި 1،000ރ. ގެ އިތުރުވުމެއް 35 ޕަސެންޓް މުވައްޒަފުންނަށް، 500ރ. ގެ އިތުރުވުމެއް 11 ޕަސެންޓް އަދި 500ރ. އަށް ވުރެ ދަށް އަދަދެއް 4 ޕަސެންޓް މުވައްޒަފުންގެ މުސާރައިން ފެންނާނެ އެވެ.
ސިވިލް ސާވިސް މުވައްޒަފުންގެ ތެރެއިން މިނިމަމް ވޭޖް އެލަންވަސްގެ ގޮތުގައި އިތުރުވާނީ އެ މީހެއްގެ އަސާސީ މުސާރައަށް ފިކްސްޑް އެލަވަންސްތަކާ އެކު 7،000ރ. ހަމަނުވާ މީހުންނަށެވެ. މިނިމަމް ވޭޖް އެލަވަންސް ލިބެނީ ސިވިލް ސާވިސް މުވައްޒަފުންގެ ތެރެއިން ސަޕޯޓް ސާވިސް ރޭންކުތަކުގައި މަސައްކަތްކުރާ މުވައްޒަފުން ޖެނެރަލް ސާވިސް ރޭންކުތަކުގައި މަސައްކަތްކުރާ މުވައްޒަފުންނަށް އެކަންޏެވެ.
ފައިޒަލް ވިދާޅުވީ އެންމެ ކުޑަ އުޖޫރަ ދިނުމުގެ ގޮތުން މުސާރައިގެ އޮނިގަނޑަށް ވަރަށް ބޮޑަށް ބަދަލުތަކެއް ގެންނަންޖެހޭކަމަށެވެ. އެހެންކަމުން މިދޭންފަށާ އެލެވެންސަކީ ވަގުތީ ގޮތުން މި ސިޔާސަތު ތަންފީޒުކުރަން ދޭން ފަށާ އެއްޗެއްކަމަށް އޭނާ ވިދާޅުވި އެވެ.
އަސާސީ މުސާރައަށް ބަދަލު ނުގެންނަން މުވައްޒަފުންގެ އިތުރު ގަޑީގެ އެލަވަންސަށް އަދި ޕެންޝަނަށް ވެސް އިތުރު ބަދަލެއް މިނިމަމް ވޭޖާ އެކު ނާންނާނެ އެވެ. މިނިމަމް ވޭޖް އެލަވަންސްއެއް ދޭން ނިންމުމުން އެކި މުވައްޒަފުންނަށް ލިބޭނީ މި އެލަވަންސް އެކި ވަރަށެވެ. މިނިމަމް ވޭޖް އެލަވަންސް ލިބޭ މުވައްޒަފުންނަށް އަންނަ މަހުގެ 15 ގެ ކުރިން މުސާރައަށް އަންނާނެ ބަދަލުތައް އަންގާނެ ކަމަށް ސިވިލް ސާވިސް ކޮމިޝަންގެ ޑިރެކްޓަ ޖެނެރަލް އަބްދުﷲ ސައީދު ވިދާޅުވި އެވެ.
އެންމެ ކުޑަ އުޖޫރަ ދިނުމަށްޓަކައި ދައުލަތުގެ ބަޖެޓަށް އިތުރު 500 މިލިއަން ރުފިޔާ ވަނީ އިތުރުކޮށްފަ އެވެ. ޖެހިގެން އަންނަ 2023 ވަނަ އަހަރު އެއަށްވުރެއް ބޮޑު އަދަދެއް މިކަމަށްޓަކައި ހާއްސަކުރަން ނިންމާފައިވާއިރު 2024 ވަނަ އަހަރު އެންމެ ކުޑަ އުޖޫރަ ދިނުމަށް އެއް ބިލިއަން ރުފިޔާ ކަނޑައަޅަން ވަނީ ޕްލޭންކޮށްފަ އެވެ.
