ޕައިލެޓުންގެ ގޮތުގައި ތަމްރީނުވުމަށް ޓްރިޕަލް އޭގައި އުނގެނެމުން ދިޔަ ހުރިހާ ދަރިވަރުންނަށް އައިލެންޑް އޭވިއޭޝަނުން ފަށާ ކޯހަށް ބޭނުންވާ ފީ ލޯނެއްގެ ގޮތުގައި ސަރުކާރުން ހަމަޖައްސައިދޭން ނިންމައިފި އެވެ.
އައިލެންޑް އޭވިއޭޝަނާއި މޯލްޑިވްސް ނެޝަނަލް ޔުނިވަސިޓީގެ އިތުރުން ޗެކް ރިޕަބްލިކްގެ ފްލައިންގ އެކެޑަމީއާއި ގުޅިގެން ދާދި ފަހުން ވަނީ މޯލްޑިވްސް އޭވިއޭޝަން އެކެޑަމީ، އެމްއޭއޭގެ ނަމުގައި އެކެޑަމީއެއް ހުޅުވައިފަ އެވެ.
އައްޑޫ ސިޓީގައި މީގެ ކުރިން ހިންގި ޓްރިޕަލް އޭ ގައި ގިނަ ދަރިވަރުންތަކެއް ތަމްރީނުވަމުން ދަނިކޮށް އެ ސްކޫލު ހުއްޓުމަކަށް އައިސް ގިނަ ޕައިލެޓު ދަރިވަރުންތަކެއް ހަރަދުކުރި ފައިސާ ނުލިބި ބޮޑެތި ގެއްލުންތަކެއް ވަނީ ލިބިފަ އެވެ. އައިލެންޑް އޭވިއޭޝަނުން ވަނީ އެހުރިހާ ދަރިވަރުންނަށް ތަމްރީނު ދިނުމަށް އެމްއޭއޭއޭއިން ޕައިލެޓް ޕްރޮގުރާމެއް ފަށަން ނިންމައިފަ އެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ ޓްރިޕަލް އޭގައި ކިޔެވި ހުރިހާ ދަރިވަރުންނަށް ލޯނެއްގެ ގޮތުގައި ކޯސް ފީ ހަމަޖައްސައިދޭން ނިންމާފައިވާ ކަމަށެވެ. އެގޮތުން އެންމެ ފުރަތަމަ ކުރިއަށް ގެންދާ ރިފްރެޝާ ކޯހަށް ހަރަދުވާ ފަނަރަސަތޭކަ ޑޮލަރު ފުރަތަމަ ހަމަޖައްސައިދޭނެ ކަމަށް އޭނާ ވިދާޅުވި އެވެ.
"އެބައި ފުރިހަމަކޮށް ނިމުނީމަ ދެން ކޯހަށް ބޭނުންވާ ފައިސާ، އެމުއްދަތު ހަމަވީމަ އެފައިސާވެސް ސަރުކާރުން ހަމަޖައްސައިދެއްވާނެ" މިނިސްޓަރު ވިދާޅުވި އެވެ.
މީގެ އިތުރުން މި ނޫސްވެރިންގެ ބައްދަލުވުމުގައި މިނިސްޓަރު ވަނީ ޗާޓަރޑް ޕްރޮފެޝަނަލް އެކައުންޓެންޓުން ތަމްރީނު ކުރުމަށް 150 ސްކޮލަރޝިޕްގެ ފުރުސަތު ހުޅުވާލުމަށް ނިންމާފައިވާކަން އިއުލާން ކުރައްވައިފަ އެވެ. އެގޮތުން ވިދާޅުވީ އޭގެ ތެރެއިން 50 ފުރުސަތު ޕަބްލިކް ސެކްޓަރއަށް ޚާއްސަކޮށްފައިވާއިރު، 100 ފުރުސަތު ޚާއްސަކޮށްފައިވަނީ ޕްރައިވެޓް ސެކްޓަރއަށް ކަމަށެވެ. މިއީ އެކައުންޓިންގ ދާއިރާއިން މީހުން ބިނާކުރުމަށް ހުރި ގޮންޖެހުންތަކަށް ޙައްލު ހޯދުމަށް މުހިއްމު ކަމެއްކަމަށް މިނިސްޓަރ ވިދާޅުވި އެވެ.
މި ފުރުސަތު ހުޅުވާލަނީ ފުރަތަމަ ޑިގްރީ އަދި މާސްޓަރސް ފެންވަރުގެ ސަނަދު ޙާސިލު ކޮށްފައިވާ ދަރިވަރުންނަށެވެ. އެގޮތުން މި ސްކީމްގެ ދަށުން ރަޖިސްޓްރޭޝަން ފީ، އެނުއަލް ސަބްސްކްރިޕްޝަން ފީ، އެކްޒާމް ފީ އަދި ބުކް އެލަވަންސް ފަދަ އިނާޔަތްތައް ސީދާ މިނިސްޓްރީން ހަމަޖައްސައިދޭއިރު، ރަޖިސްޓަރޑް ކޮލެޖުތަކާއި ޔުނިވަރސިޓީތަކުގެ ދަރިވަރުންނަމަ ޓިއުޝަން ފީވެސް މިނިސްޓްރީން ދެއްކުމަށް ވަނީ ހަމަޖެހިފަ އެވެ.
އެކައުންޓެންޓުން ތަމްރީނު ކުރުމަށް ސަރުކާރުން މަސައްކަތް ކުރަމުންދާކަމަށް މީގެ ކުރިން ރައީސް އިބްރާހިމް މުހައްމަދު ޞާލިހުވެސް ވަނީ ވިދާޅުވެފަ އެވެ. އެމަނިކުފާނު ވިދާޅުވީ ރާއްޖޭގައި އެކައުންޓެންޓު ދާއިރާ ތަރައްގީކުރުމަށްޓަކައި، އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްއަށް ބޭނުންވާ ހުރިހާ އެހީތެރިކަމެއް ފޯރުކޮށްދިނުމުގެ އިތުރުން، އެކައުންޓެންޓުން ތަމްރީނުކޮށް، ފަންނީ ގާބިލުކަން އިތުރުކުރުމަށް ފުރުސަތުތައް ވެސް ތަނަވަސްކޮށްދެއްވާނެ ކަމަށެވެ.
މިހާރުގެ ތަފާސްހިސާބުތަކަށް ބަލާއިރު، ރާއްޖޭގެ ޕްރައިވެޓް ސެކްޓަރގައި ގާތްގަނޑަކަށް 4500 އަށްވުރެ ގިނަ ބިދޭސީން މަސައްކަތް ކުރެ އެވެ. ރާއްޖޭގައި އިންކަމް ޓެކްސް ދައްކާ މީހުންގެ 15 އިންސައްތައަކީ، އެކައުންޓިންގ ދާއިރާގެ މީހުންކަން ފާހަގަކޮށްލެވެ އެވެ.
