ކޮވިޑް-19 އަށް އިތުރު 2838 މީހުން އިއްޔެ ޕޮޒިޓިވްވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ ހޮނިހިރު ދުވަހު އިރުއޮއްސި 6:00 އިން އާދިއްތަ ދުވަހުގެ އިރުއޮއްސި 6:00 އަށް ނެގި 7394 ސާމްޕަލްގެ ތެރެއިން 3،615 ސާމްޕަލް ނަގާފައިވަނީ މާލެ ސަރަހައްދުން ކަމަށެވެ. މި ސާމްޕަލްތަކުގެ ތެރެއިން ޕޮޒިޓިވްވެފައިވަނީ 2838 މީހުންނެވެ.
އެއީ މާލެ ސަރަހައްދުން 1295 މީހުން، އަތޮޅުތެރެއިން 1066 މީހުން، ހިންގަމުންދާ ރިސޯޓުތަކުން 49 މީހުން، ސަފާރީތަކުން 4 މީހުންނެވެ. އަދި 424 މީހުން ޕޮޒިޓިވްވެފައިވަނީ ކޮން ސަރަހައްދަކުންކަން ދެނެގަނެވިފައިނުވާ ކަމަށް އެޗްޕީއޭއިން ބުނެއެވެ.
އަދަދުތަކާ އެކު އެކްޓިވް ކޭސްތަކުގެ އަދަދު ވަނީ 17،589 އަށް އަރައިފަ އެވެ. އަދި 53 މީހަކަށް އެޑްމިޓްކޮށްގެން ފަރުވާދެ އެވެ.
މި ބަލީގައި އިއްޔެ ވަނީ ނައިފަރު ހޮސްޕިޓަލުގައި ފަރުވާ ހޯދަމުން އައި 66 އަހަރުގެ ދިވެހި އަންހެނެއް ނިޔާވެފަ އެވެ. އެއާ އެކު މި ބަލީގައި ރާއްޖެއިން މަރުވި މީހުންގެ އަދަދު ވަނީ 275 އަށް އަރައިފަ އެވެ.
