މޯލްޑިވްސް އިންޓިގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އިންތިޒާމު ކުރާ "ސަވާދީއްތަ ދަތުރު"ގެ މެއިން ސްޕޮންސަރަކަށް އެމްޓީސީސީ ހަމަ ޖައްސައިފި އެވެ.
އެމްޓީސީސީ ބުނީ ރާއްޖޭގައި ޓޫރިޒަމަށް 50 އަހަރު ފުރޭ މުނާސަބަތާ ދިމާކޮށް އެމްއައިޓީޑީސީން ބާއްވާ ސަވާދީއްތަ ދަތުރުގެ މެއިން ޕާޓްނަރެއްގެ ގޮތުގައި ބައިވެރިވުމަށް މިއަދު އެއްބަސްވުމުގައި ސޮއިކޮށްފައިވާ ކަމަށެވެ.
އެމްޓީސީސީގައި މިއަދު ބޭއްވި ރަސްމިއްޔާތެއްގައި އެއްބަސްވުމުގައި އެމްއައިޓީޑީސީގެ ފަރާތުން ސޮއި ކުރީ އެމްއައިޓީޑީސީގެ މެނޭޖިން ޑިރެކްޓަރ މުހައްމަދު ރާއިދެވެ. އަދި އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމް އެވެ.
އެމްއައިޓީޑީސީގެ އެ އިވެންޓަކީ ވަކީ ތީމެއް ކަނޑައަޅައިގެން ބާއްވާ އިވެންޓެކެވެ. މިފަހަރުގެ ރެލީގެ ތީމަކީ ރާއްޖޭގެ ގައުމީ ބަޠަލް އައްސުލްތާން މުހައްމަދު ތަކުރުފާނުލް އައުޒަމްގެ ދިރިއުޅުއްވުމެވެ. މިފަހަރު ދަތުރުކުރާ ގިނަ ރަށްތަކަކީ ބޮޑުތަކުރުފާނުގެ ހަޔާތުގެ ވާހަކަތަކާއި ގުޅޭ އާސާރުތައް ހިމެނޭ ރަށްރަށެވެ.
ޔޮޓް ރެލީގައި ފަސް އަތޮޅެއްގެ 15 ރަށަކަށް ދަތުރު ކުރަން ހަމަޖެހިފައިވެއެވެ. އޭގެ ތެރޭގައި މީހުން ދިރިނޫޅޭ ހަތަރު ރަށެއް ހިމެނެއެވެ. އެ15 ރަށަކީ ހއ. އުތީމު، ހއ. އުލިގަން، ހއ. ހޯރަފުށި، ހއ. މަތީރަށް، ހއ. ގައްލަންދޫ، ހއ. އިހަވަންދޫ، ހއ. ބާރަށް، ހދ. ނޮޅިވަރަންފަރު، ށ. ފުނަދޫ، ށ. ފަރުކޮޅު، ށ. ނަލަންދޫ، ނ. ލަންދޫ، ހއ. ބިލެތްދޫތިލަ، ބ. ތުޅާދޫ އަދި ކުޅުދުއްފުށި ސިޓީ އެވެ.
ރާއްޖޭގެ ފަތުރުވެރިކަމުގެ ސިނާއަތަށް 50 އަހަރު ފުރުމާ ދިމާކޮށް ބާއްވާ ސަވާދިއްތަ ދަތުރު އޮންނާނީ ފެބްރުއަރީ މަހުގެ ތިނަކުން 20 އަށެވެ.
