މިދިޔަ މަހު އެކަނި ވެސް ވައްކަމުގެ 337 މައްސަލަ ރިޕޯޓް ކޮށްފައިވާކަމަށް ފުލުހުންގެ ތަފާސްހިސާބުތަކުން ދައްކައިފި އެވެ.
ފުލުހުންގެ ތަފާސްހިސާބުތަކުން ދައްކާ ގޮތުން އެންމެ ގިނައިން ހުށައެޅުނު މައްސަލަތަކަކީ ވެސް ވައްކަމުގެ މައްސަލަ ތަކެވެ. މި އަހަރުގެ މިހާތަނަށް 881 މައްސަލަ އެ މުއައްސަސާއަށް ހުށައަޅާފައިވާއިރު ވައްކަމުގެ މައްސަލަތަކުގެ އިތުރުން ދެން ހުށައަޅާފައިވާ މައްސަލަތަކަކީ އެއްޗެހި ގެއްލިގެންް 115 މައްސަލައެއް، މަސްތުވާތަކެތީގެ 113 މައްސަލައެއް،ގެވެށި އަނިޔާގެ 23 މައްސަލައެއް، ހިޔާނާތުގެ 59 މައްސަލައެއް ވެސް ވަނީ ހުށަހަަޅައިފަ އެވެ.
މިއަހަރުގެ މިހާތަނަށް އެކްސިޑެންޓް ވެގެން 96 މައްސަލައެއް ހުށައެޅިފައިވާއިރު ފޭރުމުގެ 25 މައްސަލަ، ޖިންސީ ފުރައްސާރައިގެ 27 މައްސަލަ، މާރާމާރީގެ 34 މައްސަލަ ވެސް މި އަހަރުގެ މިހާތަނަށް ފުލުހުންނަށް ވަނީ ހުށަހަޅައިފަ އެވެ.
މިއަހަރުގެ ޖެނުއަރީ މަހު ވައްކަމުގެ 337 މައްސަލަ ފުލުހުންނަށް ހުށައަޅާފައިވީ ނަމަވެސް މިދިޔަ އަހަރުގެ ޖެނުއަރީ މަހު ފުލުހުންނަށް ހުށައަޅާފައިވަނީ ވައްކަމުގެ 509 މައްސަލަ އެވެ. އެހެންކަމުން މިދިޔަ އަހަރުގެ ޖަނަވަރީ މަހަށްވުރެ މި އަހަރުގެ ޖަނަވަރީ މަހު ވައްކަމުގެ މައްސަލަ މަދެވެ.
މިދިޔަ އަހަރު 4754 ވައްކަމުގެ މައްސަލަ ފުލުހުންނަށް ހުށައަޅާފައިވާ ކަމަށް ފުލުހުންގެ ތަފާސް ހިސާބުތަކުން ދައްކަ އެވެ.
