ޓޫރިސްޓް ރިސޯޓެއް ތަރައްގީކުރުމަށް ވ. އާރަށް ކުއްޔަށްދޫކުރުމުގެ މުއާމަލާތާ ގުޅިގެން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް އުފުލާފައިވާ ދެ ދައުވާގެ ހުކުމް އިއްވުން އަންނަ ޖޫން މަހުގެ 30 ވަނަ ދުވަހަށް އަވަސްކޮށްފި އެވެ.
ކުރިން އެމައްސަލައިގެ ހުކުމް ކުރުން އޮތީ މިއަހަރުގެ ނޮވެމްބަރު މަހުގެ 25 ވަނަ ދުވަހަށެވެ.
އާރަށު މައްސަލައިގައި ރައީސް ޔާމީންގެ މައްޗަށް އުފުލައިފައިވަނީ މަނީލޯންޑަރިންގެ ދައުވާ އާއި ރިޝްވަތު ގަބޫލުކުރުމުގެ ދައުވާއެވެ.
ރައީސް ޔާމީންގެ މައްޗަށް ދައުވާ އުފުލާފައިވާ ދެ މައްސަލައިގެ އަޑުއެހުންތައްވެސް އަވަސްވެ،ޖޫން 30 ގެ ކުރިން ދެ މައްސަލަ ވެސް ނިންމަން ކްރިމިނަލް ކޯޓުން މިހާރު ވަނީ ތާވަލެއް އެކުލަވާލާފަ އެވެ.
އާރަށު ޚިޔާނާތުގެ މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ ޖެނުއަރީ 27 ވަނަ ދުވަހު އެވެ.
އެމައްސަލަ ކްރިމިނަލް ކޯޓުގައި ބައްލަވަނީ ގާޒީ އަހުމަދު ޝަކީލެވެ.
އާރަށް މައްސަލާގައި ޔާމީނަށް ކުރާ ރިޝްވަތު ގަބޫލު ކުރުމުގެ ދައުވާ ސާބިތުވެއްޖެ ނަމަ، ތިން އަހަރުގެ ޖަލު ހުކުމެއް އަންނާނެ އެވެ. އަދި މަނީ ލޯންޑްރިންގެ ދައުވާ ސާބިތުވެއްޖެ ނަމަ، މަދުވެގެން ފަސް އަހަރުގެ ޖަލު ހުކުމެއް އަންނާނެ އެވެ.
