ހުޅުމާލޭގައި އަންހެނެއްގެ ނުރުހުމުގައި އޭނާއަށް ޖިންސީ ގޯނާކޮށް، ރޭޕް ކުރި މައްސަލައެއް ބަލަން ފަށައިިފި އެވެ.
ފުލުހުން ބުނީ މިދިޔަ ހަފްތާގެ އާދިއްތަ ދުވަހު ހުޅުމާލޭގައި ދިވެހި އަންހެނަކަށް ފިރިހެނަކު ގަދަކަމުން ޖިންސީ އަމަލު ހިންގި މައްސަލައެއް ފުލުހުންނަށް ހުށަހަޅާފައިވާ ކަމަށެވެ.
އެ މައްސަލާގައި ތުހުމަތުކުރެވޭ އުމުރުން 43 އަހަރުގެ މީހާ ވަނީ މިދިޔަ ހަފްތާގެ އަންގާރަ ދުވަހު ހައްޔަރުކޮށްފަ އެވެ.
އެމީހާ މިދިޔަ އަންގާރަ ދުވަހު ހައްޔަރުކޮށް ބަންދަށް ފުރަތަމަ ވަނީ ފަސް ދުވަސް ޖަހައިފައެވެ.
ފަސް ދުވަސް ހަމަވުމުން ދެވަނަ ފަހަރަށް ކޯޓަށް ހާޒިރުކުރުމުން ހޯމަ ދުވަހު ވަނީ އަނެއްކާވެސް ބަންދަށް ފަސް ދުވަސް އިތުރުކޮށްފައެވެ.
އެމީހާ ބަންދު ކުރަން ނެރުނު ކޯޓު އަމުރުގައި ބުނެފައި ވަނީ އޭނާގެ މައްޗަށް ތުހުމަތުކުރާ މައްސަލައާ ގުޅޭ ވަަރަށް އެކަށީގެންވާ ހެކި ހުށަހަޅާފައިވާ ކަމަށެވެ. އެހެންވެ، މުޖުތަމައުގެ ސަލާމަތަށްޓަކައި އޭނާ ބަންދުގައި ބަހައްޓަން އިތުރު ފަސް ދުވަސް ކޯޓުން ދިނެވެ.
ފުލުހުން މިހާރު ވަނީ އެ މައްސަލައިގެ ތަހުގީގު ފަށައިފައެވެ.
