އަންނަ އޭޕްރިލް 16 ގައި ބާއްވާ އެމްޑީޕީގެ ޗެއާޕާސަންގެ އިންތިޚާބާއި ދިމާކޮށް، އެޕާޓީގެ ސްލޮޓްތަކުގައި ސަރުކާރުގެ މަގާމުތަކުގައި ތިބި ބަޔަކަށް ވަޒީފާގެ ބިރު ދައްކާ ކަމަށް ވިދާޅުވެ ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ކުއްލި މައްސަލައެއް ހުށަހަޅުއްވައިފިއެވެ.
ވައްޑެއަކީ އެ އިންތިހާބުގައި ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)ގެ ތަރުޖަމާން އެވެ.
ދެން މި އިންތިޚާބުގައި ވާދަކުރައްވަނީ ރައީސް އިބްރާހީމް މުހައްމަދު ސޯލިހްގެ އެންމެ ނުފޫޒުގަދަ ވަޒީރު، އިކޮނޮމިކް މިނިސްޓަރު ފައްޔާޒު އިސްމާއީލްއެވެ.
ވައްޑެ ހުށަހެޅުއްވި ކުއްލި މައްސަލަ ތަޅުމަށް ބަލައިގަނެ ބަހުސަށް ހުޅުވާލަން ފާސްކުރީ 23 މެންބަރުންގެ ވޯޓުންނެވެ. އެ މައްސަލަ ބަހުސަށް ހުޅުވާލަން ނުފެންނަ ކަމަށް ވޯޓު ދެއްވީ ތިން މެންބަރުންނެވެ. އެހެންވެ އެ މައްސަލަ ބަހުސަށް ހުޅުވާލަން ވެސް ފާސްވިއެވެ.
އެ މައްސަލަ ހުށަހަޅުއްވަމުން ވައްޑެ ވިދާޅުވީ، ގާނޫނުއަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާ އަށް ބާރުތަކެއް ލިބިފައިވީ ނަމަވެސް އެ ބޭރުތައް ބޭނުން ކުރަން ވާނީ ގާނޫނުއަސާސީގައި އޮންނަ ތަފާތު ނުކުރުމާއި ހަމަހަމަކަމުގެ އިންތަކުގެ ތެރެއިން ކަމަށެވެ.
ނަމަވެސް އެމްޑީޕީގެ ޗެއާޕާސަން އިންތިހާބާ ދިމާކޮށް، ވަކި ބަޔަކު ސަރުކާރުގެ މަގާމުތަކުން ވަކި ކުރަމުންދާ ކަމުގެ ޝަކުވާ ލިބެމުން އަންނަ ކަމަށާއި އޭގެ ސަބަބުން ސަރުކާރާ މެދު ނަފްރަތު އުފެދި ބައިބައިވުން ބޮޑުވާނެ ކަމަށް އޭނާ ވިދާޅުވި އެވެ.
މި މައްސަލަ ހުށަހެޅީ ރ. ދުވާފަރު ސިއްހީ މަރުކަޒާ ހަވާލުވެ ހުންނެވި އެމްޑީޕީ މެމްބަރެއް ކަމަށްވާ އާމިރު އަހުމަދު ރައިސުލްޖުމްހޫރިއްޔާ އަށް ލިބިދޭ ބާރުގެ ދަށުން ވަޒީފާ އިން ވަކިކުރައްވާފައިވާތީ އެވެ.
މި މައްސަލައާއި ގުޅިގެން ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވަނީ އެމްޑީޕީ ވަޓްސް އެޕް ގްރޫޕްގައި ވެސް ވާހަކަ ދައްކަވައިފައެވެ. ރައީސް ސޯލިހްގެ އަރިހުގައި ނަޝީދު ދެންނެވި ކަމަކީ، އެ ގޮތަށް ވަޒީފާއިން ވަކިކުރާނަމަ ނަޝީދު ވެސް މަގާމުން ވަކިކުރެއްވުމަށެވެ.
