ބޭންކް އޮފް މޯލްޑިވްސް (ބީއެމްއެލް) ކޮމިއުނިޓީ ފަންޑުގެ ދަށުން އިސްރަށްވެހިންނަށް ހާއްސަކޮށް އައްޑޫ ސިޓީ ފޭދޫގައި "މާމަ ކާފަ ޕާކު" މިއަދު ހުޅުވައިފިއެވެ.
ބީއެމްއެލުން މިއަދު ބުނީ މި ޕްރޮޖެކްޓުގެ މަގުސަދަކީ ދުޅަހެޔޮ ސިއްހަތެއްގައި ތިބުމަށް ބާރުއަޅައި އިޖުތިމާއީ ހަރަކާތްތަކުގައި އިސްރަށްވެހިންގެ ބައިވެރިވުން އިތުރުކޮށް ގުޅުން ބަދަހިކޮށް އެއްބައިވަންތަ މުޖުތަމައުއެއް ބިނާކުރުން ކަމަށެވެ.
މި ޕާކުގައި ހިޔާވާނެ ގޮތަށް ބެންޗު ބަހައްޓައި ޕާކަށް ޒިޔާރަތް ކުރާ ފަރާތްތަކަށް ކެރަމް، ތާސް އަދި ޗެސް ފަދަ ކުޅިވަރުތައް ކުޅެވޭނެހެން މޭޒާއި ގޮނޑި ބަހައްޓާފައިވާ ކަމަށް އެ ބޭންކުން ބުންޏެވެ. އަދި މި ސަރަަހައްދަށް ނިސްބަތްވާ ޖަމިއްޔާތަކާ ގުޅިގެން ހެލްތު ޗެކަޕް ފަދަ ހަރަކާތްތަކާއި ހޭލުންތެރިކުރުމުގެ ގިނަ ޕްރޮގްރާމުތައް މި ޕާކުގައި ހިންގުމަށް ހަމަޖެހިފައިވާ ކަމަށްވެސް ބީއެމްއެލުން ބުންޏެވެ.
މި ޕްރޮޖެކްޓާ ގުޅޭގޮތުން ޕްރޮޖެކްޓު ކާމިޔާބު ކުރި ފަރާތުން ވާހަކަދައްކަވަމުން ޝިމްލާ އަހުމަދު ވިދާޅުވީ "މާމަ ކާފަ" ޕާކަކީ، މާމަ އަދި ކާފަމެންނަށް އާއިލާ އާއި ރައްޓެހިންނާއެކު ވަގުތު ހޭދަކޮށްލައި ގުޅުން ބަދަހިކުރުމަށް މާހައުލެއް ހޯދައިދިނުމުގެ ގޮތުން ތަރައްގީ ކުރެވުނު ޕާކެއް ކަމަށެވެ.
"މިއީ މިރަށުގެ އިސްރަށްވެހިންނަށް ހާއްސަކޮށް ހުޅުވުނު ޕާކެއް ކަމުން އަޅުގަނޑުމެންގެ އުންމީދަކީ އުފާވެރި ހެލިފެލިވެ އުޅޭ މާމާމެންނާއި ކާފަމެން މި ޕާކުން ގިނައިން ފެނުން،" އޭނާ ވިދާޅުވިއެވެ.
ކޮމިއުނިޓީ ފަންޑަކީ އަމިއްލަ ފަރުދުންނާއި ހިލޭ ސާބަހަށް މަސައްކަތްކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ ޕްރޮޖެކްޓުތަކަށް މާލީ އެހީތެރިކަން ފޯރުކޮށްދިނުމަށް ހުޅުވާލެވިފައިވާ ފަންޑެކެވެ. ކޮމިއުނިޓީ ފަންޑުގެ ދަށުން މިހާތަނަށް 60 ޕްރޮޖެކްޓެއް ހިންގުމަށް ފައިސާގެ އެހީ ވަނީ ފޯރުކޮށްދީފައެވެ.
