އަމާޒަކީ ސްޓެލްކޯގެ އިންޖީނުގެތަކާއި އޮފީސްތަކަކީ ސޯލާއިން އޮޕަރޭޓްކުރާ ތަންތަނަށް ހެދުން ކަމުގައި އެކުންފުނީގެ މެނޭޖިން ޑިރެކްޓަރު ހަސަން މުޣުނީ ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުހީ" ޕްރޮގްރާމްގައި މުޣުނީ ރޭ ވިދާޅުވީ، މާލޭ ސަރަހައްދުގެ ކަރަންޓުގެ ވިއުގަ އަޕްގްރޭޑްކުރުމުގެ މަސައްކަތް ކުރަމުން އަންނަ ކަމަށާއި ކުރިއަށް އޮތް ދެ އަހަރުގެ ތެރޭގައި އެ މަސައްކަތް އެއްކޮށް ނިމޭނެ ކަމަށެވެ.
އިޔާދަކުރަނިވި ހަކަތައަށް ބަރޯސާވާ މިންވަރު އިތުރުކުރަން ޖެހޭކަން ފާހަގަކުރައްވައި މުޣުނީ ވިދާޅުވީ، އަމާޒަކީ، ފާއިތުވި ތިން އަހަރުގެ ތެރޭގައި އިޔާދަކުރަނިވި ހަކަތައިގެ 40 އަށް ވުރެ ގިނަ މަޝްރޫއު ސްޓެލްކޯއިން އެކަނިވެސް ހިންގާފައިވާ ކަމަށާއި ސޯލާ ޖަހާލުމަށް ސްޓެލްކޯގެ އަމިއްލަ ޕެކޭޖުތަކެއްވެސް އެބަހުރި ކަމަށެވެ. އެގޮތުން ކުޑަކުޑަ ޑައުންޕޭމެންޓެއް ދެއްކުމުން ބިލުން ރައްކާކުރެވޭ އަދަދުން އަނބުރާ ދެއްކޭ ނިޒާމެއް ގާއިމު ކުރެވިފައިވާ ކަމަށެވެ.
"އަޅުގަނޑުމެންގެ ޕްލޭނުގައި އެބައޮތް އަޅުގަނޑުމެންގެ އިންޖީނުގެތަކަކީ ސެލްފް ސަސްޓެއިނަބަލް ގޮތަކަށް ސޯލާއިން އޮޕަރޭޓްކުރާ ތަންތަނަށް ހެދުން. މި ދެންނެވީ އިންޖީނުގޭގެ ބިލްޑިންގެ ވާހަކަ، އަދި އަޅުގަނޑުމެންގެ އޮފީހުގެ ވާހަކަ މި ދެންނެވީ" މުޣުނީ ވިދާޅުވިއެވެ.
މުޣުނީ ވިދާޅުވީ، ސޯލާއަށް އޮތް އެންމެ ބޮޑު ގޮންޖެހުމަކީ ސޯލާ ޖެހުމަކީ ވަރަށް ބޮޑު ސަރަހައްދެއް ބޭނުންވާ ކަމަކަށްވެފައި އެވަރަށް ބިން ނެތުމުން ކަމަށެވެ.
މުޣުނީ އިތުރަށް ވިދާޅުވީ ސޯލާއަށް އޮތް ދެވަނަ ހައްލަކީ، ފްލޯޓިން ސޯލާ ކަމަށާއި ސްޓެލްކޯގެ ޕްރޮޑަކްޓެއް މިހާރުވެސް އެބައުޅޭ ކަމަށާއި ސްޓެލްކޯއިން ފަރުމާކުރާ ފްލޯޓިން ސޯލާގެ އިތުރު ޕްރޮޑަކްޓެއް ވަރަށް އަވަހަށް ލޯންޗުކުރެވިގެންދާނެ ކަމަށެވެ.
