އުރީދޫ މޯލްޑިވްސްގެ އަހަރީ އާންމު ޖަލްސާ އަންނަ މަހުގެ ހަތް ވަނަ ދުވަހު ބާއްވަން ނިންމައިފިއެވެ.
އުރީދޫން މިއަދު ބުނީ އަހަރީ އާންމު ޖަލްސާ އޮންނާނީ އަންނަ މަހުގެ ހަތް ވަނަ ދުވަހުގެ ރޭ 8:30 ގައި ކަމަށެވެ. ޖަލްސާގައި ބައިވެރިވާން ރަޖިސްޓްރީވާ ފަރާތްތަކަށް އޮންލައިންކޮށް ނުވަތަ ޖަލްސާ ބާއްވާ ތަން ކަމުގައިވާ، ކްރޮސްރޯޑްސް މޯލްޑިވްސްގެ އިވެންޓް ހޯލަށް ހާޒިރުވެގެން ވެސް ބައިވެރިވެވޭނެއެވެ.
ކޮވިޑްގެ މިހާރުގެ ހާލަތާއި ހިއްސާދާރުންގެ ސަލާމަތާއި ރާއްކާތެރިކަމަށް ބަލައި ޖަލްސާގެ ބައިވެރިވުމުގެ ފުރުސަތު ދެވެން އޮތީ، ޖަލްސާ ބާއްވާއިރު ސަރުކާރުން އިއުލާންކޮށްފައިވާ މިންގަނޑުތަކާ އެއްގޮތަށް ސަރުކާރުން އިއުލާނުކޮށްފައިވާ މިންގަނޑުތަކާ އެއްގޮތަށް ސަރުކާރުން ހުއްދަކުރާ އަދަދަކަށް ބަލައިގެން ކަމަށް އުރީދޫން ބުންޏެވެ. އަދި އެގޮތަށް ޖާގަ ދިނުމަށްފަހު ބާކިތިބި ފަރާތްތަކަށް އޮންލައިންކޮށް ޖަލްސާގައި ބައިވެރިވެވޭނެ އިންތިޒާމު ހަމަޖައްސައިދޭނެ ކަމަށް އުރީދޫން ބުންޏެވެ.
އުރީދޫން ބުނީ ޖަލްސާ ބާއްވާތަނަށް ހާޒިރުވެ ޖަލްސާގައި ބައިވެރިވުމަށް ރަޖިސްޓްރީ ކޮށްފައިވާ ފަރާތްތަކަށް ޖަލްސާގައި ބައިވެރިވެވޭނީ ކްރޮސްރޯޑުގެ އިވެންޓު ހޯލުގައި ކަމަށެވެ. އަދި އޮންލައިންކޮށް ޖަލްސާގައި ބައިވެރިވެވޭނީ މޯލްޑިވްސް ސެކިއުރެޓީ ޑިޕޮސިޓް ކޮމްޕެނީ ޕްރައިވެޓް ލިމިޓެޑް (އެމްއެސްޑީ)ގެ އޮންލައިން ޖެނެރަލް މީޓިން މެނޭޖްމެންޓް ސިސްޓަމް ކަމުގައިވާ "ފަހިވޯޓު" މެދުވެރިކޮށް ކަމަށެވެ.
ކްރޮސް ރޯޑަށް ހާޒިރުވެ ޖަލްސާގައި ބައިވެރިވުމަށް އެދޭ ފަރާތްތަކުގެ ތެރެއިން ހުއްދަ ދެވޭނީ ވެކްސިން ޑޯޒުތައް ފުރިހަމަ ކޮށްފައިވާ ފަރާތްތަކަށް ކަމަށް އުރީދޫން ބުންޏެވެ. އަދި ޖަލްސާގައި ބައިވެރިވެވޭނީ މާޗު މަހުގެ ފަސް ވަނަ ދުވަހުގެ 8:30 ގެ ކުރިން ރަޖިސްޓްރީކުރާ ފަރާތްތަކަށް އެކަނި ކަމަށެވެ.
ޖަލްސާގައި ބައިވެރިވުމަށް ޝަރުތުހަމަވާ ހިއްސާދާރުން ޖަލްސާގައި ބައިވެރިވުމަށް "ޕްރީ- ރެޖިސްޓްރޭޝަން ފޯމް" އަދި ޕްރޮކްސީއެއް އައްޔަންކުރާނަމަ "ޕްރޮކްސީ" މާޗު މަހުގެ ފަސް ވަނަ ދުވަހުގެ 8:30 ގެ ކުރިން ހުށަހަޅަން ޖެހެއެވެ. އަދި ޕްރޮކްސީ ބާތިލުކުރަން ބޭނުންވެއްޖެނަމަ "ޕްރޮކްސީ ރީވޮކޭޝަން ފޯމު" ފުރިހަމަކުރަން ޖެހޭނެ ކަމަށެވެ. އެފޯމުތައް އުރީދޫގެ ވެބްސައިޓުން ޑައުންލޯޑު ކުރެވޭނެއެވެ.
