ގައުމީ ޕޭމަންޓް ސިސްޓަމުގެ ގާނޫނުގެ ދަށުން ރާއްޖެގައި ޕޭމަންޓް ހިދުމަތް ދިނުމުގެ ލައިސަންސް ފުރަތަމަ ފަހަރަށް އުރީދޫ މޯލްޑިވްސް އާއި ދިރާގަށް ދީފިއެވެ.
އެމްއެމްއީން މިއަދު ބުނީ ރާއްޖޭގައި އަލަށް އެކުލަވާލެވުނު ގައުމީ ޕޭމަންޓް ސިސްޓަމްގެ ގާނޫނުގެ ދަށުން އުރީދޫއަށް އިލެކްޓްރޯނިކް މަނީ އިޝޫކުރުމުގެ ހިދުމަތާއި ރެމިޓަންސް ހިދުމަތް ދިނުމަށް ބޭނުންވާ ޕޭމަންޓް ހިދުމަތް ދިނުމުގެ ލައިސަންސް އަދި ދިރާގަށް އިލެކްޓްރޯނިކް މަނީ އިޝޫކުރުމުގެ ހިދުމަތް ދިނުމަށް ބޭނުންވާ ޕޭމަންޓް ހިދުމަތް ދިނުމުގެ ލައިސަންސް މިމަހުގެ 18 ވަނަ ދުވަހު ދޫކޮށްފައިވާ ކަމަށެވެ.
ގައުމީ ޕޭމަންޓް ސިސްޓަމްގެ ގާނޫނުގެ ދަށުން ޕޭމަންޓްގެ ހިދުމަތް ދިނުމުގެ ލައިސަންސް އެ ދެ ކުންފުންޏަށް ދޫކުރުމާއެކު ކުރިން އުރީދޫ އާއި ދިރާގަށް ދޫކޮށްފައިވާ މޮބައިލް ޕޭމަންޓް ހިދުމަތް ދިނުމުގެ ލައިސަންސް މިހާރު ބާތިލުކޮށްފައިވާ ކަމަށް ވެސް އެމްއެމްއޭއިން ބުންޏެވެ.
މި ލައިސަންސްގެ ދަށުން އުރީދޫން އަލަށް ތައާރަފު ކުރުމަށް ނިންމާފައިވާ ރެމިޓަންސް ހިދުމަތަކީ އެ ކުންފުނިން ދެމުންގެންދާ އެމް ފައިސާ ވޮލެޓް މެދުވެރިކޮށް ރާއްޖެއިން ބޭރަށް ފައިސާ ފޮނުވޭ ގޮތަށް ފަރުމާކުރެވިފައިވާ ހިދުމަތެއް ކަމަށް އެމްއެމްއީން ބުންޏެވެ.
ގާއުމީ ޕޭމަންޓް ސިސްޓަމް އިތުރަށް ހަރުދަނާކޮށް ތަރައްގީކުރުމަށް ކުރެވޭ މަސައްކަތްތަކުގެ ތެރެއިން އެއް ވިއުގައެއް މެދުވެރިކޮށް ގިނަ ޕޭމަންޓް ހިދުމަތްތަކެއް ރައްޔިތުންނަށް ލުއިފަސޭހަކަމާއެކު ފޯރުކޮށްދެވޭނެ ގޮތް މަގުފަހިކޮށްދިނުމަށް މަސައްކަތް ކުރަމުންދާ ކަމަށްވެސް އެމްއެމްއޭއިން ބުންޏެވެ.
ރާއްޖޭގައި ކުރެވޭ މާލީ މުއާމަލާތްތައް ހަރުދަނާކޮށް ޒަމާނީ ފެންވަރަށް ކުރިއެރުވުމަށް ގައުމީ ޕޭމަންޓް ސިސްޓަމެއް ގާއިމުކުރުމަށް ރައްޔިތުންގެ މަޖިލީހުން ފާސްކޮށްފައިވަނީ މިދިޔަ އަހަރުގެ އެޕްރީލް މަހުގެ 27 ވަނަ ދުވަހުއެވެ.
މިއީ ރާއްޖެ އާއި ރާއްޖޭއިން ބޭރަށް ފަސޭހަކަމާއެކު ބޭންކު މެދުވެރިކޮށް ވަގުތުން ފައިސާ ފޮނުވުމުގެ ހިދުމަތް ލިބިގެންދާނެ ޕޭމަންޓް ނިޒާމެއް ގާއިމުކުރުމަށް ފާސްކުރި ގާނޫނެކެވެ.
ޕޭމަންޓް ނިޒާމުގެ ސަބަބުން ކުދި ވިޔަފާރިތަކާއި މެދުފަންތީގެ ވިޔަފާރިތަކަށް ޕޭމަންޓް އިންޑަސްޓްރީގައި ހަރަކާތްތެރިވުމުގެ ފުރުސަތު ލިބިގެންދިއުމާއެކު ހަރަދުކުޑަ ޕޭމަންޓް ހެދޭނެ ތަފާތު ސޮލިއުޝަންތައް މާކެޓަށް ނެރުމުގެ ފުރުސަތު ފަހިވެގެންދާނެ ކަމަށް އެމްއެމްއޭގެ ގަވަރުނަރު އަލީ ހާޝިމު ވަނީ މީގެ ކުރިން ވިދާޅުވެފައިވެއެވެ.
