ރައްޔިތުންގެ މަޖިލީހުގެ އިދާރާއަށް އަމިއްލަ މިއުޒިކް ޓްރެކްތަކެއް ހަދައިދޭނެ މިއުޒިކް ޕްރޮޑިއަސަރެއް ހޯދަން އިއުލާންކޮށްފިއެވެ.
މަޖިލީހުން ކުރި އިއުލާނެއްގައި ބުނީ އެ އިދާރާއިން އުފައްދާ ވީޑިއޯތަކުގައި ބޭނުން ކުރުމަށް އެ އިދާރާއަށް ފުރިހަމަ ކޮޕީރައިޓްސްގެ ހައްގު އޮންނަ އަމިއްލަ މިއުޒިކް ޓްރެކްތަކެއް ހަދަން ބޭނުންވާ ކަމަށެވެ. މި މަސައްކަތަށް ބީލަން ހުށަހަޅަން ރަޖިސްޓްރީ ކުރުމުގެ ފުރުސަތު މިމަހުގެ ނުވަ ވަނަ ދުވަހާއި ހަމައަށް ވަނީ ހުޅުވާލާފައެވެ. ބީލަން ހުށަހެޅުމާއި ހުޅުވުން އޮންނާނީ މަރޗް 15 ވާ އަންގާރަ ދުވަހުގެ 11 ގައި މަޖިލީހުގެ އިދާރާގައެވެ. އެ އިދާރާއިން ބުނީ ބިޑު ހުށަހެޅުމުގެ ފުރުޞަތު ދެވޭނީ އީމެއިލް މެދުވެރިކޮށް ބިޑު ހުށަހެޅުމަށް ރަޖިސްޓްރީކޮށްފައިވާ ފަރާތްތަކަށް އެކަނި ކަމަށެވެ.
ބީލަން ހުޅުވުމަށް ހަމަޖައްސާފައިވާ ތާރީޚަކީ އެއްވެސް ސަބަބަކާ ހުރެ ސަރުކާރުން ބަންދު ދުވަހެއްގެ ގޮތުގައި ހަމަޖައްސައިފިނަމަ ބީލަން ހުޅުވުން އޮންނާނީ ޖެހިގެން އަންނަ ރަސްމީ ދުވަހު ކަމަށް ވެސް އެ އިއުލާނުގައި ވެއެވެ.
