މާލޭގެ އެއް ނަންބަރު ކުނިކޮށްޓާ ދިމާލުން ނީލަން މުދާ ވިއްކާ ސަރަހައްދު ސާފުކުރުމަށް މާލެ ސިޓީ ކައުންސިލުން އަންގައިފިއެވެ.
މާލޭ ސިޓީ ކައުންސިލުން އިއްޔެ ކުރި އިއުލާނެއްގައި ބުނެފައިވަނީ، މާލޭ ދެކުނު ފަރާތު ކުރީގެ އެއް ނަމްބަރު ކުނިކޮށި ހިމެނޭ ސަރަހައްދުގެ ފަޅުމަތީ މަގުގައި އެކި ފަރާތްތަކުން މުދާ ބަހައްޓައިގެން ވިޔަފާރި ކުރުމުގެ އިތުރުން މަގުމައްޗަށް ގިނަ އަދަދަކަށް ކުނި އަޅަމުންދާ ކަމަށެވެ. އަދި މިގޮތަށް ކުނި އަޅަމުންދާތީ، އާންމު ރައްޔިތުންނާއި، ދައުލަތުގެ ކަމާބެހޭ މުއައްސަސާތަކުން ސިޓީ ކައުންސިލަށް މައްސަލަ ހުށަހަޅަމުންދާ ކަމަށެވެ.
މީގެއިތުރުން ސިޓީ ކައުންސިލުން ބުނީ، މީގެކުރިން މިކަން މިގޮތަށް ނުކުރުމަށް އެކައުންސިލުން އަންގާފައިވާ ކަމަށެވެ. އެހެންކަމުން މިހާރު އެ ސަރަހައްދުގެ މަގުމައްޗާއި، ނީލަން މުދާ ވިއްކާ ގޮޅިތަކުން ބޭރުގައި ހުރި އެކި ބާވަތްތަކުގެ މުދަލާއި މަގުމައްޗަށް އަޅާފައި ހުރި ކުނިތައް އެތަކެތި ބެހެއްޓި ފަރާތްތަކުން މިމަހުގެ 10 ވަނަ ދުވަހުގެ 18:00 ގެ ކުރިން ނަގައި ސާފުކުރުމަށް އަންގާ ކަމަށެވެ.
އަދި އެތަނުގައި ބަހައްޓާފައި ހުރި ތަކެތި މި މުއްދަތުގެ ނިޔަލަށް ނުނަގައި ބަހައްޓައިފިނަަމަ، ކައުންސިލުން އެތަކެތި ކުނީގެ ގޮތުގައި ނައްތާލާނެ ކަމަށްވެސް ސިޓީ ކައުންސިލުން ބުނެއެވެ. މީގެއިތުރުން މިތަކެތި ނެގުމުގައާއި ނެގުމަށްފަހު ތަކެއްޗަށް ލިބޭ ގެއްލުމާއި އުނިއިތުރަށް ޒިންމާ ނުވާނެ ކަމަށްވެސް މާލެ ސިޓީ ކައުންސިލުން ބުނެއެވެ.
