ކުރީގެ ރައީސް ޔާމީންގެ ވެރިކަމުގައި ހިޔާ މަޝްރޫޢުގެ ދަށުން ސްޓެލްކޯއިން އެޅި ފްލެޓްތައް ނިމި، އެކުންފުނީގެ މުވައްޒިފުންނަށް ފްލެޓްގެ ތަޅުދަނޑި ހަވާލުކުރުމަށް ތައްޔާރުވެއްޖެއެވެ.
ޔާމީންގެ ސަރުކާރުގައި، ކުންފުނިތަކުގެ މުވައްޒަފުންނަށް ފްލެޓް އަޅަން ނިންމައި ހުޅުވއިލުމުން 15 ކުންފުންޏަކުން މަޝްރޫއު ކުރިއަށް ގެންދަން އުޅުނެވެ. އެކަމަކު އެކި ސަބަބުތަކާ ހުރެ މި މަޝްރޫއު ކުރިއަށް ގެންދެވުނީ އެންމެ ހަ ކުންފުންޏަށެވެ. އޭގެ ތެރޭގައި ހިމެނެނީ ސްޓެލްކޯގެ އިތުރުން އެމްޕީއެލް އާއި އެމްއޭސީއެލް އާއި އެމްޑަބްލިއުއެސްސީ އާއި އެމްޓީސީސީ އަދި އެސްޓީއޯއެވެ.
މިކުންފުނިތަކުގެ ތެރެއިންވެސް އެންމެ އަވަހަށް ފްލެޓްތަކުގެ މަސައްކަތް ނިންމައި މުވައްޒިފުންނަށް ފްލެޓް ދިނުމަށް ތައްޔާރުވެފައިވަނީ، ސްޓޭލްކޯއިންނެވެ. އެކުންފުނިން މުވައްޒިފުންނަށް ފޮނުވާފައވާ ސާކިއުލާގައި ބުނެފައިވަނީ މިފެށޭ މަހުގެ ތެރޭގައި ފްލެޓްތައް ހަވާލު ކުރަން ނިންމާފައިވާކަމަށެވެ.
ސްޓެލްކޯ ސްޓާފް ހައުސިންގެ ތެރެއިން އެތަނުގެ މުވައްޒަފުންނަށް 15 ފަންގިފިލާގެ ދެ ރެޒިޑެންޝަލް ބިލްޑިންގް އިމާރާތް ކުރަން ހަވާލުކުރިއެވެ. އެއީ ޖުމްލަ 384 އެޕާޓްމެންޓެވެ. އޭގެ ތެރެއިން އެއް ކޮޓަރީގެ 72 އެޕާޓްމަންޓް ސަރުކާރުން ކަނޑައަޅާފައިވާ އަގެއްގައި ވިއްކުމަށްވެސް ކަނޑައަޅާފައިވެއެވެ.
މި ފްލެޓްތަކަށް ކުންފުނީގެ 300 މުވައްޒަފުން ކުރިމަތިލިއިރު އުސޫލު އޮތީ، ކުރިމަތިލާ އެންމެން ވެސް ޝަރުތު ހަމަވެ ފްލެޓް ލިބޭ ގޮތަށެވެ. ހަ ފްލެޓެއް ބޯޑު މެމްބަރުންނަށް ހާއްސަކުރިއެވެ. އޭގެ ތެރެއިން ފްލެޓެއް ސްޓެލްކޯގެ ކުރީގެ އެމްޑީ މުޢުނީއަށްވެސް ލިބި ވަޑައިގެންނެވިއެވެ. އޭނާދަނީ އެފްލެޓަށް ފައިސާ ދައްކަމުންނެވެ.
ސްޓެލްކޯގެ މުވައްޒިފުންގެ ފްލެޓްތައް ނިމި، ފްލެޓުތައް ހަވާލުކުރަން އުޅޭކަމުގެ އުފާވެރި ޚަބަރު ދީފައިވަނީ ކުރިއަށް ރަމަޟާން މަސްވެސް ކައިރިވެފައިވަނިކޮށެވެ. ގިނަ ކުންފުނިތަކުން ހަދަމުންދާ ފްލެޓުތައް މިހާރު ނިމުމަކާއި ގާތްވެފައިވާއިރު، މިއަހަރުގެ ތެރޭގައި ކުންފުނިތަކުން ހަދާ ފްލެޓްތަކަށް މުވައްޒިފުންނަށް ވަދެވޭ ވަރުވާނެކަމަށް ގިނަ ކުންފުނިތަކުން ދެކެއެވެ.
