އެމްޑީޕީގެ ގައުމީ މަޖިލީހުގެ އަޣްލަބިއްޔަތުން ޗެއަރޕަރސަންގެ އިންތިޚާބު މެއިމަހުގެ 14އަށް ފަސްކޮށްފިއެވެ.
އެމްޑީޕީގެ އެތެރޭގެ އިންތިޚާބު މީގެ ކުރިން ބޭއްވުމަށް ނިންމީ އެޕްރީލް މަހުގެ 16 ވަނަ ދުވަހުއެވެ. ނަމަވެސް ރަމަޟާން މަހުގެ ތެރޭގައި އިންތިޚާބު ބާއްވަން ޖެހޭތީ ޗެއަރޕަރސަންގެ އިންތިހާބަށް ކުރިމަތިލެއްވި އިކޮނޮމިކް މިނިސްޓަރ ފައްޔާޒު އިސްމާއީލް ހުށަހެޅުއްވީ އިންތިޚާބު ރަމަޟާން މަހުގެ ތެރޭގައި ނުބާއްވައި, އެހެން ތާރީޚެއް ގައުމީ މަޖިލީހުން ކަނޑައަޅައިދިނުމަށެވެ.
އިންތިޚާބު ބާއްވަން ކުރިން ކަނޑައެޅި ތާރީޚު ރޯދަ މަހާ ދިމާވާތީ އިންތިޚާބު ފަސްކުރަން ފައްޔާޒް ހުށަހެޅުއްވިޔަސް، އެ މަގާމަށް ދެން ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އެކަމާ ދެކޮޅެވެ. އޭނާ ވިދާޅުވާ ގޮތުން އިންތިޚާބު ބާއްވަން ޖެހޭނީ ކުރިން ހަމަޖެއްސި ތާރީޚު ނުވަތަ އެއަށް ވުރެ އަވަހަށެވެ.
މި ބައްދަލުވުމަށްފަހު ހާޒިރުވި 115 މެންބަރުންގެ ތެރެއިން 100 މެންބަރުން ވޯޓު ދެއްވީ މެއި މަހުގެ 14 ވަނަ ދުވަހަށް އިންތިޚާބު ފަސްކުރުމަށެވެ.
ފައްޔާޒްގެ ފަރާތުން އައި ހުށަހެޅުން ފާސްވުމުން އިންތިގެ ހުށަހެޅުމަށް ވޯޓަކަށް ނާހަ އެވެ.
އިންތިހާބު ބާއްވާނެ ތާރީހަކާ މެދު ގޮތެއް ނިންމަން ގައުމީ މަޖިލީހަށް ދާން ވެސް ޖެހުނީ ދެފަރާތުން ވާހަކަ ދައްކައިގެން މިކަމުގައި ގޮތެއް ނުނިމި މައްސަލަ ބޮޑުވުމުންނެވެ.
