އާންމު ހިއްސާދާރުންގެ ތެރެއިން އުރީދޫގެ ބޯޑަށް ފަރީހާ ޝަރީފް އިންތިހާބުކޮށްފިއެވެ.
އެ މަގާމަށް ފަރީހާ އިންތިހާބުކޮށްފައިވަނީ ކްރޮސްރޯޑްސް މެރީނާގައި ރޭ ބޭއްވި އުރީދޫގެ އަހަރީ އާންމު ޖަލްސާގައެވެ. ފަރީހާއަކީ 2020 ވަނަ އަހަރުވެސް އެ މަގާމަށް އިންތިހާބުކުރި ހިއްސާދާރެވެ.
އެ ޖަލްސާގައި އަމިއްލަ ގޮތުން 101 ހިއްސާދާރެއްގެ އިތުރުން ޕްރޮކްސީގެ ގޮތުގައި 1101 ހިއްސާދާރުން ބައިވެރިވިއެވެ. އެއީ ޖުމުލަ 135,970,377 ހިއްސާއެވެ. ޖަލްސާގައި ބައިވެރިވީ އުރީދޫގެ 92 ޕަސެންޓް ހިއްސާދާރުންނެވެ.
ޑިރެކްޓަރުންގެ ބޯޑަށް ފަރީހާއާ ވާދަކޮށްފައިވަނީ 2020 ވަނަ އަހަރު އޭނާއާ ވާދަކުރި ތިން ހިއްސާދާރުންގެ ތެރެއިން ދެ ހިއްސާދާރެކެވެ. އެއީ އާއިޝަތު ހުސައިން މަނިކާއި އިބްރާހިމް ފިރުޝާނެވެ.
އެ މަގާމަށް ފަރީހާ އިންތިހާބުވީ ވޯޓުގައި ބައިވެރިވި 1201 ހިއްސާދާރުންގެ ތެރެއިން 732 ހިއްސާދާރުންގެ ވޯޓާއެކުއެވެ. އެއީ 60.9 ޕަސެންޓް ވޯޓެވެ. ފަރީހާއާ އެންމެ ގާތުން ވާދަކުރި ފިރުޝާނަށް 461 ވޯޓު ލިބުނު އިރު, އާއިޝަތު ހުސައިން މަނިކަށް ލިބުނީ އަށް ވޯޓެވެ.
ފަރީހާއަކީ މެއި 2015 އިން އޮގަސްޓް 2017 އަށް އުރީދޫގެ ޗެއާޕާސަންކަމުގެ މަގާމު އަދާކުރެއްވި ބޭފުޅެކެވެ. އޭގެ ކުރިން އޭނާ ވަނީ ބީއެމްއެލް އާއި މޯލްޑިވްސް ޕެންޝަން އެޑްމިނިސްޓްރޭޝަން އޮފީސް އަދި މޯލްޑިވްސް ހައުސިން ޑިވެލޮޕްމަންޓް ފައިނޭންސް ކޯޕަރޭޝަންގައިވެސް މަސައްކަތް ކުރައްވައިފައެވެ.
ފަރީހާ ވަނީ ނިއުޒީލެންޑްގެ ޔުނިވާސިޓީ އޮފް ވައިކާޓޯއިން މާސްޓާސް އޮފް މެނޭޖްމަންޓް ސްޓަޑީޒްއާއި ނިއުޒީލެންޑްގެ ލިންކަން ޔުނިވާސިޓީން ބެޗެލާ އޮފް ކޮމާސް އަދި ފެލޯ މެމްބަރު އޮފް އެސޯސިއޭޝަން ޗާޓާޑް ސެޓިފައިޑް އެކައުންޓަންޓްސް (އޭސީސީއޭ)ވެސް ހާސިލުކުރައްވައިފައެވެ.
ފަރީހާއަކީ އުރީދޫގެ އިތުރުން ކޮމާޝަލް ބޭންކް އޮފް މޯލްޑިވްސްއާއި އެފްޖޭއެސް ކޮންސަލްޓިންގެވެސް ބޯޑު މެންބަރެކެވެ. އުރީދޫ ޑިރެކްޓަރުންގެ ބޯޑަށް އިންތިހާބުވި ފަރީހާގެ ދެވަނަ ދައުރު ހަމަވާނީ 2024 ގައެވެ.
