ބޭންކް އޮފް މޯލްޑިވްސް (ބީއެމްއެލް)ގެ ކާޑުތައް ރަޝިއާގައި ބޭނުން ނުކުރެވޭނެ ކަމަށް އެ ބޭންކުން ބުނެފިއެވެ.
ބީއެމްއެލުން މިއަދު ބުނީ، ރަޝިއާއިން ޔުކްރޭނަށް ދެމުންދާ ހަމަލާތަކުގެ ސަބަބުން ދުނިޔޭގެ އެކި ގައުމުތަކުގެ ބޭންކުތަކާއި ސްވިފްޓްގެ އިތުރުން ކާޑު ނެޓްވޯކުތަކުން ރަޝިއާއާ މެދު އަޅާ ދަތިކުރުމުގެ ފިޔަވަޅުތަކާ ގުޅިގެން ބީއެމްއެލްގެ ކާޑުތައް ވެސް އެ ގައުމުގައި ބޭނުން ނުކުރެވޭނެ ކަމަށެވެ.
ޔޫކްރޭނަށް ރަޝިއާއިން ދެމުންދާ ހަމަލާތައް ހުއްޓާލުމަށް އަންގައި ގިނަ ގައުމުތަކުން އަންނަނީ އިގުތިސާދީގޮތުން ރަޝީއާއަށް ފިޔަވަޅުތައް އަޅަމުންނެވެ. އޭގެ ތެރޭގައި އެމެރިކާ ވެސް ހިމެނެއެވެ. ބީއެމްއެލްގެ ކަސްޓަމަރުން ގެންގުޅެނީ އެމެރިކާގެ ކާޑު ނެޓްވޯކުތައް ކަމަށްވާ އެމެރިކަން އެކްސްޕްރެސް އާއި ވިސާ އާއި މާސްޓާ ކާޑެވެ.
ބީއެމްއެލުން ބުނީ ރަޝިއާގައި އެމެރިކާގެ އެ ނެޓްވޯކުތަކުގެ ކާޑުތައް ބޭނުން ނުކުރެވޭ ގޮތް ހަދަން އިއްޔެ ނިންމާފައިވާ ކަމަށާއި ރަޝިއާގެ އިތުރުން ފިޔަވަޅު އަޅާފައިވާ އެހެން ސަރަހައްދުތަކުގައި ވެސް ކާޑުތައް ބޭނުން ނުކުރެވޭނެ ކަމަށެވެ.
އެ ސަރަހައްދުތަކަށް ނިސްބަތްވާ ފަރާތްތަކުން ކާޑު މެދުވެރިކޮށް ކުރާ މުއާމަލާތްތަކުންް މާޗަންޓުންނަށް ވެސް ފައިސާ ނުލިބޭނެ ކަމަށެވެ. އެހެންކަމުން ރާއްޖޭގައި ތިބި ރަޝިއާގެ ޓޫރިސްޓުންނަށް ވެސް އެ ކާޑުތައް ބޭނުންކޮށްގެން ފައިސާ ނުދެއްކޭނެ ކަމަށް ވެސް ބީއެމްއެލުން ބުންޏެވެ.
ދުނިޔޭގެ ޕޭމަންޓް ސިސްޓަމަށް އައި ބަދަލާއެކު ރާއްޖޭން ބޭރަށް ފައިސާ ފޮނުވުމާއި ބޭރުން ފައިސާ ގެނައުމުގެ ހިދުމަތް، ޓެލެގްރާފިކް ޓްރާންސްފާ (ޓީޓީ) އަށް ވެސް ވަނީ އަސަރުކޮށްފައެވެ. ދަތިކުރުމުގެ ފިޔަވަޅު އަޅާފައިވާ ސަރަހައްދުތަކުގެ ބޭންކުތަކަށް ޓީޓީ ފޮނުވުމުގައި އިތުރު ވަގުތު ހޭދަވުމާއި ޓީޓީ ނުފޮނުވޭނެ ހާލަތެއް މެދުވެރިވެދާނެ ކަމަށް ބީއެމްއެލުން ބުންޏެވެ.
