ފައްޔާޒާއި ރޮޒައިނާއަކީ އިންތިޚާބުގައި ވާދަކުރައްވާ ދެ ކެންޑިޑޭޓުންކަމަށާއި "އެހާ ބޮޑަށް އަތްއުކައި، ކަނޑިކި ނަގާ، ކަރުބުޑުން ނެރޭ އަޑުފައްގަނޑު ނެރި ހަޅޭލެވުން އެއީ އެޕާޓީއަށް ލިބޭ ވަރަށްބޮޑު ހުތުރެއްކަމަށް" ނަޝީދު ވިދާޅުވެއްޖެ އެވެ.
އެންމެ ފަހުން ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ޗެއާޕާސަނެއް އިންތިޚާބު ކުރުމަށް ނަގާ ވޯޓު ރޯދަ މަސް ތެރެއަށް ވުމުން އުނދަގޫތަކެއް ކުރިމަތިވާނެ ކަމަށް ވިދާޅުވެ ގައުމީ މަޖިލީހުން ގޮތެއް ނިންމަން ހުށަހެޅުއްވީ ޗެއާޕާސަން ކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއިލްގެ ކެމްޕޭން ޓީމުން ހުށައަޅައި އެތާރީޚު މެއި މަހުގެ 14 ވަނަ ދުވަހަށް ވަނީ ފަސްކޮށްފައެވެ. ކުރިން އިންތިޚާބު ބާއްވަން ކަނޑައެޅީ އެޕްރީލް މަހުގެ 16 ވަނަ ދުވަހަށެވެ. އެގޮތަށް ފާސްކުރީ ގައުމީ މަޖިލީހުގެ 100 މެމްބަރުންގެ ވޯޓުންނެވެ. މިކަމާ ދެކޮޅުވީ 15 މެމްބަރުންނެވެ.
ގައުމީ މަޖިލީހުގެ އެ ޖަލްސާގައި ޗެއާޕާސަންކަމަށް ކުރިމަތިލައްވާ އިމްތިޔާޒު ފަހުމީގެ ފެކްޝަނާއި ފައްޔާޒްގެ ފެކްޝްންގެ މެންބަރުން ހުތުރުކޮށް ވާހަކަދައްކާ ރައްދު ދިން މަންޒަރުވެސް ފެނިގެންދިޔައެވެ. މިއާއެކު ވަރަށް ގިނަ ބައެއްގެ ފަޑުކިޔުން ވަނީ އެމްޑީޕީއަށް އަމާޒުވެފައެވެ،
އެކަމާއި ގުޅިގެން އެމްޑީޕީގެ ރައީސް މުޙައްމަދު ނަޝީދު އެޕާޓިގެ ގައުމީ މަޖިލީހުގެ ވަޓްސްއަޕް ގްރޫޕަށް ފޮނުވި މެސެޖެއްގައި ވަނީ އިންތިޚާބުގައި ވާދަކުރައްވާ ކެންޑިޑޭޓުން ރީތިކޮށް އުޅުއްވުމަށް އެދިވަޑައިގަންނަވާކަމަށާއި އެމްޑީޕީ ގައުމީ މަޖިލީހު މެންބަރުންވެސް އަޚްލާޤީ މިންގަނޑު ދޫކޮށްނުލުމަށް ނަޝިދު އެދިވަޑައިގަންނަވާ ކަމަށެވެ.
އެމްޑީޕީ ޗެއާޕާސަންގެ މަގާމަކީ ފަސް އަހަރު ދުވަހުގެ މަގާމެކެވެ.
