ޓެކްސީކުރުމުގައި ގަވާއިދާ ޚިލާފަށް ބޮޑު އަގު ނަގާ ޑްރައިވަރުންނާއި ޓެކްސީ ސެންޓަރުތަކުގެ ލައިސަންސް ބާތިލްކުރާނެކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އެވިއޭޝަންއިން ދީފިއެވެ.
ޓްރާންސްޕޯޓް މިނިސްޓްރީން ނެރުނު ބަޔާނެއްގައި ބުނީ ގްރޭޓަރ މާލެ ސަރަޙައްދުގައި ޓެކްސީ ޚިދުމަތްދޭ 16 ޓެކްސީ ސެންޓަރަކުން މިދިޔަ ހަފްތާގެ ހޯމަ ދުވަހު ދުނިޔޭގެ ބާޒާރުގައި ތެލުގެ އަގު ބޮޑުވުމާއި ގުޅިގެން ޓެކްސީ ކުރުމުގައި ނަގާ އަގުތައް ބަދަލުކޮށްދިނުމަށް އެދި ސިޓީއަކުން ދަންނަވާފައިވާކަމަށެވެ. އެހެންނަމަވެސް އެއީ ގިނަބައެއްގެ ޙައްގުތަކާއި ގުޅިފައިވާކަމަކަށްވާއިރު ހުރިހާ ފަރާތެއްގެ ޙައްގުތައް ހިމާޔަތްކުރުމަކީ ޤާނޫނުން މިނިސްޓްރީގެ މައްޗަށް ލާޒިމުކޮށްފައިވާކަމެއްކަމަށް ބަޔާނުގައިވެއެވެ. އެހެންކަމުން އަގުތަކަށް ބަދަލުގެނައުން ފިޔަވާ ޓެކްސީ ސެންޓަރުތަކުން އެދުނު ކަންކަމުގެ ތެރެއިން ވަގުތުން ފިޔަވަޅު އެޅޭނެ ހުރިހާކަމަކަށް މިނިސްޓްރީން ވަގުތުން އިޖާބަދޭނެކަމަށްވެސް ޓްރާންސްޕޯޓުގެ ބަޔާނުގައިވެއެވެ.
ޓްރާންސްޕޯޓް މިނިސްޓްރީން ބުނީ ޓެކްސީ ކުރުމުގައި އަގުތައް ކަނޑައެޅުމަކީ ޓެކްސީ ސެންޓަރުތަކަށް ކުރެވޭނެކަމެއް ނޫންކަމަށާއި އެއީ ޤާނޫނީގޮތުން ޓްރާންސްޕޯޓް މިނިސްޓްރީއަށް އޮންނަ ބާރެއްކަމަށެވެ. އެހެންކަމުން ގަވާއިދާއި ޚިލާފަށް ޓެކްސީ ސެންޓަރުތަކުން އަގުތައް ކަނޑައަޅާ ބޮޑެތި އަގުތައް ޢާއްމުންގެ އަތުން ނަގަމުންދާނަމަ ޓެކްސީ ކުރުމުގެ ގަވާއިދުގައި ބަޔާންކުރާގޮތަށް ފިޔަވަޅު އަޅާނެކަމަށް މިނިސްޓްރީން ބުނެ އެވެ.
ޓެކްސީ ގަވާއިދުގެ ދަށުން އަގު ކަނޑައެޅުމުގެ ބާރު ލިބެނީ ޓްރާންސްޕޯޓް މިނިސްޓްރީއަށެވެ. އެހެންކަމުން ޓެކްސީތަކަށާއި ޓެކްސީ ސެންޓަރުތަކަށް އަމިއްލަ އަގެއް ކަނޑައެއް ނޭޅޭނެއެވެ.އެފަދަ ކުށެއް ކުރާނަމަ އެކުށެއްކުރާ ޓެކްސީ ސެންޓަރާއި ޑްރައިވަރުގެ އަދަބަކީ ފުރަތަމަ ފަހަރު ކަމަށްވާނަމަ 500 ރުފިޔާއިން ޖޫރިމަނާކުރުމެވެ. ދެވަނަ ފަހަރުނަމަ 1000 ރުފިޔާއިން ޖޫރިމަނާކުރުމެވެ. އިތުރަށް އެކުށެއް ތަކުރާރުކުރާނަމަ އެފަރާތެއްގެ ލައިސަންސް ބާތިލްކުރުމުގެ ބާރު މިނިސްޓްރީއަށް ލިބިގެންވެއެވެ.
