އިދިކޮޅު ކޯލިޝަނުން ހުރުކުރު ދުވަހު ހިންގުމަށް ހަމަޖެހިފައިވާ "ނޭވާހޮޅިއަށް" އިންޑިއާ އައުޓް ހަރަކާތް ނުބޭއްވެނެކަމަށް ފުލުހުން އިދިކޮޅު ކޯލިޝަން އަންގައިފިއެވެ.
ފުލުހުން އިދިކޮޅު ކޯލިޝަނާއިއެކު މިއަދު ބޭއްވި ބައްދަލުވުމަށްފަހު، ނޫސްވެރިންނާއި ބައްދަލު ކުރަައްވައި ވާހަކަ ދައްކަވަމުން ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެމްބަރު މުހައްމަދު ޝާހިދު (ޝާޑު) ވިދާޅުވީ މިއަދުގެ ބައްދަލުވުމުގައި ފުލުހުން ބުނެފައިވަނީ މިހަރަކާތް ނުހިންގޭނެކަމަށެވެ. އަދި ބޮޑެތި ތުހުމަތުތަކެއްކޮށް ހަރަކާތް ކުރިއަށް ނުގެންދިއުމަށް ދަންނަވާފައިވާކަމަށެވެ.ސިޔާސީ ޕާޓީއެއްގެ ދައުރަކީ ޤާނޫނުން ވަރަށް ގިނަ ޒިންމާތަކެއް އޮތް ބަޔަކަށްވާއިރު، ހަރަކާތެއް ނުހިންގައި ބަލަންތިބުމަކީ ސިޔާސީ ޕާޓީގެ ދައުރެއް ނޫންކަމަށް އޭނާ ވިދާޅުވި އެވެ.
މިބައްދަލުވުމުގައި ބައިވެރިވި އިދިކޮޅު ތަރުޖަމާނު ހީނާ ވަލީދު ވިދާޅުވީ، އެ ހަރަކާތް ނުބޭއްވޭނެ ކަމަށް ފުލުހުން ބުނި ކަމުގައި ވިއަސް އެ ހަރަކާތް ހުކުރު ދުވަހު އޮންނާނެ ކަމަށެވެ. އަދި ގާނޫނު އަސާސީން އެއްވެ އުޅުމާއި ޚިޔާލު ފާޅު ކުރުމުގެ މިނިވަންކަން ކޮންމެ ރައްޔިތަކަށްވެސް ލިބިގެންވާކަމަށާއި އެކަން ނުހުއްޓުވޭނެ ކަމަށް ހީނާ ވިދާޅުވި އެވެ. ފުލުހުން ކުރި ތުހުމަތު ތަކަކީ އެއްވެސް ތާކުންތާކު ނުޖެހޭ ތުހުމަތު ތަކެއްކަމަށް ހީނާ ވިދާޅުވިއެވެ.
