މި އަހަރުގެ ރޯދަ މަހު ބާއްވާ އުރީދޫ މަސްރޭހުގައި 23 ޓީމަކުން ރެޖިސްޓާކޮށްފިއެވެ.
ކޮންމެ އަހަރެއްގެ ރޯދަ މަހު ކުރިއަށްގެންދާ މަސް ރޭހުގެ 11 ވަނަ ސީޒަންގައި ބައިވެރިވުމުގެ ފުރުސަތު ހަމަވެފައިވަނީ މިދިޔަ ބުރާސްފަތި ދުވަހަށެވެ. ފުރުސަތު ހަމަވިއިރު، 23 ޓީމެއް ވަނީ މަސްރޭހުގައި ބައިވެރިވުމަށް ރެޖިސްޓާކޮށްފައެވެ.
ކޮވިޑާ ގުޅިގެން ދެ އަހަރު ދުވަހުގެ މެދުކެނޑުމަކަށްފަހު މިއަހަރު އަނެއްކާވެސް އުރީދޫ މަސްރޭސް ބާއްވާއިރު، މި ހަރަކާތަށް ބޮޑު ތަރުހީބެއް ލިބިފައިވާތީ އެކުންފުނިން ވަނީ މިއަހަރު މަސްރޭހުގައި ބައިވެރިވުމަށް ރެޖިސްޓާ ކުރި ހުރިހާ ޓީމަކަށް ފުރުސަތު ދިނުމަށް ނިންމައިފައެވެ.
އުރީދޫ މަސްރޭހަކީ ކޮންމެ އަހަރެއްގެ ރޯދަ މަހު އުރީދޫ މޯލްޑިވްސްއިން ބާއްވާ މަސްބޭނުމުގެ މުބާރާތެކެވެ. މި މަސްބޭނުމުގެ މުބާރާތަށް ވަނީ ބޮޑު ތަރުހީބެއް ލިބި ދިވެހިންގެ ރޯދަމަހުގެ ބަޔަކަށްވެފައެވެ. ރައްޓެހިންނާއި އާއިލާ މެންބަރުން އަދި އޮފީސްތަކުގައި އެއްކޮށް މަސައްކަތްކުރާ ރައްޓެހިންނާއެކު ޓީމު ހަދައިގެން އުފާވެރި ވަގުތުކޮޅެއް ހޭދަކޮށްލުމަށް ކުރެވޭނެ ކަމަކަށްވެފައެވެ. މުޅި ރޯދަމަހަށް ބަހާލެވިގެން ކުރިއަށްގެންދާ މި މުބާރާތަކީ އާއްމުކޮށް ފަރުމަސް ބާނާ މުބާރާތެކެވެ.
މުޅި މުބާރާތުން ހޮވާ ވަނަތަކާއި ލިބޭ އިނާމުތަކަކީ:
- އެއްވަނަ ހޯދާ ޓީމަށް 50،000 (ފަންސާސް ހާސް) ރުފިޔާ
- އެންމެ ގިނަ މަސް ބޭނި "މުބާރާތުގެ މަސްވެރިޔާ" އަށް 5000 (ފަސް ހާސް) ރުފިޔާ އާއި ރަންކޯރި
- އެންމެ ބަރުމަސް ބޭނި ފަރާތަށް 5000 (ފަސް ހާސް) ރުފިޔާ
އުރީދޫ މަސްރޭސް، ރޯދަ މަހުގެ ފަހުދިހައިގެ ދުވަސްތައް ފިޔަވައި، ކޮންމެ އަންގާރަ އަދި ހޮނިހިރު ދުވަހެއްގައި ބޭއްވުމަށް ވަނީ ހަމަޖައްސައިފައެވެ. ގްރޭންޑް ފިނާލޭ ބޭއްވުމަށް ހަމަޖެހިފައި ވަނީ 1 މެއި 2022 ގައެވެ.
