ރައްޔިތުންގެ މަޖިލީހުގެ މިއަދުގެ ޖަލްސާއަށް މަސްވެރިކަމާއި ބެހޭ ވަޒީރު ޑޮކްޓަރ ހުސެއިން ރަޝީދު ހަސަން ހާޒިރު ކުރެވިފައިވަނީ އޮޅުމަކުން ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ޖަވާބަށް އެދިފައިވަނީ ލިޔުމުން ކަމަށްވާތީ ވަޒީރު ހާޒިރުކޮށް، ގިނަ ސުވާލުތަކެއް ކުރުމަށްފަހު ސުވާލުގެ ބައި ނިންމާލައިފިއެވެ.
ޑރ.ހުސެއިން މިއަދު މަޖިލީހަށް ހާޒިރުކުރީ ދިއްދޫ ދާއިރާގެ މެމްބަރު އަބްދުﷲ ވަހީދު ހުށަހެޅުއްވި ސުވާލަކާއި ގުޅިގެންނެވެ. ވަހީދު ކުރައްވާ ސުވާލަކީ ހއ.ދިއްދޫގައި އައިސް ޕްލާންޓެއް ގާއިމްކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު ވަނީ ވަޢުދުވެ ވަޑައިގެންފައިވާކަމަށާއި، އެއާ އެއްގޮތަށް، 2021 ސެޕްޓެންބަރު 8 ވަނަ ދުވަހު، ސަޢޫދީ ފަންޑުގެ އެހީގައި ހއ. ދިއްދޫގައި 25 ޓަނުގެ އައިސް ޕްލާންޓެއް ގާއިމްކުރުމުގެ މަސައްކަތް، މިނިސްޓްރީ އޮފް ފިނޭންސްގެ ފަރާތުން ވަނީ އިޢުލާންކުރައްވާފައިކަމަށެވެ.އެހެން ނަމަވެސް، އޭގެ ފަހުން އެކަމުގެ އެއްވެސް މަޢުލޫމާތެއް ނުލިބޭތީ މިހާރު އެކަން ގޮސްފައިވާހިސާބަކީ ކޮބައިތޯ؟ އަދި އައިސް ޕްލާންޓް ގާއިމްކުރުމުގެ ޢަމަލީ މަސައްކަތް ފެށި އޭގެ ޚިދުމަތް ރައްޔިތުންނަށް ލިބިގެންދާނެ ކަމަށް ލަފާ ކުރާ ތާރީޚެއް އޮޅުން ފިލުވުމަށެވެ.
މަރަދޫ ދާއިރާގެ މެމްބަރު އިބްރާހިމް ޝަރީފް ވަނީ ނިޒާމީ ނުކުތާ ނަންގަވައި މިނިސްޓަރު ހާޒިރު ކޮށްފައި ވަނީ ގޯސްކަމަށް ވިދާޅުވެފައެވެ. އެގޮތަށް ބައިގަޑިއިރެއްހާ އިރު އެކި މެމްބަރުންގެ ސުވާލުތަކަށް މިނިސްޓަރަށް ޖަވާބު ދެއްވަމުން ގެންދަވަނިކޮށް މަރަދޫ ދާއިރާގެ މެމްބަރު އިބްރާހިމް ޝަރީފް ވަނީ ނިޒާމީ ނުކުތާ ނަންގަވައި ވަޒީރާއި ސުވާލު ކުރަން އޮތީ މަޖިލީހުގެ ގަވައިދުގެ 80 ވަނަ މާއްދާގެ ދަށުން ލިޔުމުންކަމަށް ދަންނަވާފައެވެ.
ޝަރީފު އެހެން ވިދާޅުވުމުން މަޖިލީހުގެ ރައީސް މުހައްމަދު ނަޝީދު ވިދާޅުވީ ޝަރީފް ވިދާޅުވި ގޮތަށް މަޖިލީހަށް ގޯހެއް ހެދިފައިވާ ކަމަށެވެ.
އިއްޒަތްތެރި ވަޒީރު މި ތަނަނަށް ވަޑައިގަންނަވަން ދެންނެވުނީ ގޯހުން. އިއްޒަތްތެރި ވަޒީރަށް ސުވާލުގެ ޖަވާބު މި ތަނަށް ލިއުމުން ފޮނުވަން ޖެހޭނީ. އެކަންކަން މިއަދު ހިނގައި ދިޔައީ ހިނގާންވީ ގޮތަކަށް ނޫން އިއްޒަތްތެރި ވަޒީރު ވަރަށް ބޮޑަށް ޝުކުރިއްޔާ. އަދި ވަރަށް ބޮޑަށް މައާފަށް ވެސް އެދެން
ގާނޫނުއަސާސީގައި އޮންނަ ގޮތުން މިނިސްޓަރަކު މަޖިލީހަށް ހާޒިރުކޮށްގެން ސުވާލު ކުރިނަމަވެސް ނުވަތަ ލިޔުމުން ޖަވާބު ހޯދިނަމަވެސް މަޖިލީހުގެ ގަވައިދުގެ ދަށުން އެ ސުވާލަކަށް ޖަވާބު ދެއްވުމަށް މިނިސްޓަރަށް 14 ދުވަސް ލިބިވަޑައިގަންނަވަ އެވެ.
