ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒު އިތުރަށް ތަރައްގީކޮށް އެ މަރުކަޒަށް ބޭނުންވާ މުހިންމު ބަދަލުތަކެއް ގެނައުމުގައި އެހީތެރިކަން ފޯރުކޮށްދިނުމަށް ބޭންކް އޮފް މޯލްޑިވްސް (ބީއެމްއެލް) އިން ބޮޑު އެހީއެއް ދޭން ނިންމައިފިއެވެ.
މި އެހީގެ ދަށުން އެ މަރުކަޒުގައި އަލަށް ކުޑަކުދިންގެ ވޯޑެއް ގާއިމުކުރުމާއި މަރުކަޒުގެ ބަދިގެ ތަރައްގީކޮށް ޒަމާނީ ކުރުމާއި އެތަނުގައި ގާއިމުކޮށްފައިވާ ލައިބްރަރީ އިތުރަށް ފުރިހަމަކުރުމުގެ އިތުރުން މުވައްޒަފުން ބޭނުންކުރާނެ ހާއްސަ އޭރިއާއެއް ތަރައްގީކުރުމަށް ވަނީ ހަމަޖެހިފައެވެ.
މި އެހީއާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު، ޓިމް ސޯޔާ ވިދާޅުވީ ހާއްސަ އެހީއަށް ބޭނުންވަ މީހުންގެ މަރުކަޒަށް ބޮޑު ބަދަލުތަކެއް ގެނެސް އެތަނުގައި މަސައްކަތްކުރާ މުވައްޒަފުންނާއި ދައުލަތުގެ ބެލުމުގެ ދަށުގައި ތިބި މީހުންނަށް މިހާރު ކުރިމަތިވަމުންދާ ދަތިތަކަށް ހައްލެއް ހޯދާދެވޭކަމީ ލިބޭ އުފަލެއް ކަމަށެވެ.
އަދި އެ މަސައްކަތްތަކާ އެކު އެ މަރުކަޒުގައި މުހިންމު ބަދަލުތަކެއް ބޭނުންވެފައިވާ ތަންތަނަކީ ކަނޑައެޅިފައިވާ މިންގަނޑުތަކަށް ފެތޭ ތަންތަންކަމުގައި ވެގެންދާނެ ކަމަށް ވިދާޅުވިއެވެ.
އެގޮތުން އަލަށް ހަދާ ކުޑަކުދިންގެ ވޯޑާއެކު އެތަނުގެ ބެލުމުގެ ދަށުގައި ތިބި ކުޑަކުދިން ބެލުމަށް ހާއްސަ ތަނެއް ގާއިމުވެގެންދާނެކަން ފާހަގަކުރައްވައި ޓިމް ސޯޔާ ވިދާޅުވީ، ބީއެމްއެލްގެ އުންމީދަކީ އެ މަރުކަޒަށް ގެނެވޭ ބަދަލުގެ ސަބަބުން އެތަން ބޭނުންކުރާ ފަރާތްތަކުގެ ދިރިއުޅުމަށް ހެޔޮ ބަދަލެއް އައުން ކަމަށެވެ.
ބީއެމްއެލްގެ އެ ހާއްސަ ހަރަކާތަކީ މިއަހަރު ނޮވެމްބަރު މަހު ފާހަގަކުރުމަށް ހަމަޖެހިފައިވާ އެ ބޭންކުގެ 40 ވަނަ އަހަރީ ދުވަހާ ހަމައަށް ހިންގުމަށް ހަމަޖެހިފައިވާ މުޖުތަމައަށް ފައިދާ ހުރި މުހިންމު 12 ހަރަކާތުގެ ތެރެއިން އެއް ހަރަކާތެވެ.
