އުރީދޫ މޯލްޑިވްސްއިން ކޮންމެ ރަމަޟާން މަހެއްގައި ކުރިއަށްގެންދާ އުރީދޫ މަސްރޭހުގެ 11 ވަނަ ސީޒަން، ޓީމު ސްޓެލްކޯ ކަނބަލުން ކާމިޔާބުކޮށްފިއެވެ
ސްޓެލްކޯގެ އަންހެން މުވައްޒަފުންގެ އެ ޓީމުން ވަނީ މި މުބާރާތުގެ 11 އަހަރުގެ ތާރީހުގައި ރެކޯޑް މިންވަރަކަށް މަސް ބާނައިފައެވެ. އަދި މުބާރާތުގެ ތާރީހުގައި އެންމެ ގިނަ ޕޮއިންޓް ހޯދި ޓީމަކީ ވެސް ޓީމު ސްޓެލްކޯ ކަނބަލުންނެވެ. ސްޓެލްކޯ ކަނބަލުންގެ ޓީމުގައި ކޯޗާއި މެނޭޖަރު ފިޔަވައި ދެން ހިމެނެނީ ހުސް އަންހެނުންނެވެ. އެޓީމުގައި ޖުމުލަ 12 އަންހެނުން ހިމެނުނެވެ.
ފާއިތުވި ދެ އަހަރު ކޮވިޑު-19 އާ ގުޅިގެން މެދުކެނޑުމަކަށް ފަހު މިއަހަރު އަލުން ފެށި މަސްރޭހުގައި ޖުމުލަ 23 ޓީމެއް ވަނީ ވާދަކޮށްފައެވެ. އޭގެ ތެރެއިން ފައިނަލަށް ގޮސްފައިވަނީ ހަތަރު ޓީމެކެވެ. އެއީ ސްޓެލްކޯ ކަނބަލުން، ޓީމް އެފްއެސްއެމް، ޓީމް ކެޔޮޅު ބައްޕި އަދި ޓީމް ގޯޅިއަންސް އެވެ.
އެ ޓީމުތަކުގެ ތެރެއިން ޓީމް ސްޓެލްކޯ ކަނބަލުން އެއްވަނައަށް ދިޔައީ 680.80 ޕޮއިންޓް ލިބިގެންނެވެ. ދެވަނައިގައި އޮތް ޓީމް އެފްއެސްއެމްއަށް ލިބުނީ 191.05 ޕޮއިންޓެވެ. ތިންވަނަ ލިބިފައިވަނީ ޓީމް ގޯޅިއަންސްއަށެވެ. އެ ޓީމަށް ލިބުނީ 178.85 ޕޮއިންޓެވެ.
އުސްފަސްގަނޑުގައި ރޭ ބޭއްވި އުރީދޫ މަސް ރޭހުގެ ފައިނަލުގައި ޗެމްޕިއަން ޓީމުގެ އިތުރުން، އެންމެ ބަރު މަސް ބޭނި ޓީމާއި އެންމެ ގިނަ މަސް ބޭނި ޓީމު އަދި އެންމެ ހިންގާލާ ޓީމުވެސް ވަނީ ހޮވައިފައެވެ.
މުބާރާތުގެ ޗެމްޕިއަންކަށް ހޯދި ޓީމް ސްޓެލްކޯ ކަނބަލުންނަށް އިނާމުގެ ގޮތުގައި އުރީދޫން ދޭ 50،000 ރުފިޔާ އާއި، ޑީޓެކުން ދޭ އެވިންރޫޑް 9.8 ހޯސްޕަވަރުގެ އިންޖީނަކާއި ހައި ފިޝިން ޓެކްލްސްއިން ދޭ 10،290 ރުފިޔާގެ އަގުހުރި މަސްބާނާ ދޮއްޓެއްގެ އިތުރުން ލަޔަ ކެފޭގެ ފަރާތުން އެ ޓީމަށް ހާއްސަ ކެއުމަށް ދޭނެއެވެ.
މުބާރާތުގައި އެންމެ ބަރު މަސް ބަނާފައިވަނީ ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ)ގެ މުވައްޒަފު ޔާސިރެވެ. ޔާސިރު ބާނާފައިވަނީ 11.95 ކިލޯގެ ފާނައެކެވެ. އޭނާއަށް އިނާމުގެ ގޮތުގައި ލިބޭނީ އޫރީދޫން ދޭ 5،000 ރުފިޔާ އާއި ސީރިއަސް އެންގްލާސްގެ ފަރާތުން ދޭ އޯޝަންސް ލެގަސީ އެލެމެންޓަސް ޑިޕް ޖިގިން ދޮށްޓަކާއި ހައި ފިޝިންގް ޓެކްލްސް އިން ދޭ 4،850 ރުފިޔާގެ އަގުހުރި މަސްބާނާ ދޮށްޓެއްގެ އިތުރުން ކެޔޮޅު ރެސްޓޯރެންޓުގެ ފަރާތުން ދެ މީހެއްގެ ކެއުމެވެ.
އޫރިދޫ މަސް ރޭހުގެ ފިރިހެން މަސްވެރިޔާގެ މަގާމު ހޯދީ ޓީމް ސްޓެލްކޯ ކަނބަލުންގެ އަބްދުލް އަޒީޒެވެ. އޭނާ އެ މަގާމު ހޯދީ 49 މަސް ބާނައިގެންނެވެ. އިނާމުގެ ގޮތުގައި އަޒީޒަށް ލިބެނީ އުރީދޫން ދޭ 5،000 ރުފިޔާ އާއި އޮބިއަންގެ ފަރާތުން ދޭ އެކްސަސައިޒް ބައިކެއް އަދި ހައި ފިޝިންގް ޓެކްލްސް އިން ދޭ 4850 ރުފިޔާގެ އަގުހުރި މަސްބާނާ ދޮށްޓެއްގެ އިތުރުން ކެޔޮޅު ރެސްޓޯރެންޓުގެ ފަރާތުން ދެ މީހުންގެ ކެއުމެވެ.
މޯސްޓް އެންގޭޖިން ޓީމް ނުވަތަ ހިންގާލާ ޓީމުގެ މަގާމު ހޯދި ޓީމް އެފްއެސްއެމްއަށް އިނާމުގެ ގޮތުގައި ރަންފައުންގެ ފަރާތުން ދޭ ޕެނަސޮނިކް އޭސީއަކާއި ކޮފީ ޝްރަބްގެ ފަރާތުން ޓީމަށް ދޭ ތަރާވީސް ކެއުމެކެވެ.
ރޭ ބޭއްވި އުރީދޫ މަސް ރޭހުގެ ފައިނަލުގެ އިނާމު ދިނުމުގެ ހަފުލާގައި ހެރިޓޭޖް މިނިސްޓަރު ޔުމްނާ މައުމޫނާއި ރައީސް އޮފީހުގެ މިނިސްޓަރު ޒަހާ ވަހީދާއި އުރީދޫ މޯލްޑިވްސްގެ ބޯޑު މެންބަރު ދީނާ ހުސައިނާއި އެކުންފުނީގެ އެގްޒެކެޓިވް މެނޭޖްމަންޓް ޓީމު ވަނީ ބައިވެރިވެވަޑައިގެންފައެވެ.
